ҐОСПОДЇНЦИ – Подручна канцелария (ПК) Националного совиту (НС) Руснацох у Дюрдьова, хторей припадаю и Ґосподїнци, и того року помогла орґанизовац нашо швето у Ґосподнїцох, так же є отримане другераз, у просторийох Месней заєднїци (МЗ).
Шветочносц на15 годзин почала з гимну Сербиї и шветочну шпиванку Руснацох у Сербиї, а присутних привитал и програму водзел координатор ПК НС у Дюрдьове Мирон Сабадош, а спред домашнїх Руснацох Владимир Салонски и ґосподїнски грекокатолїцки парох о. Михал Холошняй. О. Холошняй з тей нагоди представительом МЗ подаровал свою кнїжку – Моноґрафию грекокатолїцкого общества при храме св. Архангела Михаила у Ґосподїнцох.
У пригодней програми участвовали поетове з Дюрдьова Владимир Кочиш и Яким Чапко, док реферат о доселєню Руснацох на тоти простори, як и до Дюрдьова и Ґосподїнцох пречитал Яким Гарди.
На означованю националого швета Руснацох у Ґосподїнцох присуствовали и предсидатель Церковного одбору нашей грекокатолїцкей церкви Владимир Иван, предсидатель КУД „Тарас Шевченко” з Дюрдьова Микола Кухар и члени Управного одбору Дружтва, як и гражданє Ґосподїнцох. По програми бул коктел и друженє.
