БЕОҐРАД – Пре нєсполньованє обовязкох зоз Спорозуменя хтори Влада Сериї и синдикати просвитних роботнїкох подписали 2015. року, нєшка у 600 школох будзе отримани штрайк спозореня. Синдикат роботнїкох у просвити Сербиї (СРПС) наявел же нє будзе отримана перша годзина у раншей и перша годзина у пополадньовай змени.
Синдикат вимага реалне, а нє линеарне звекшанє плацох занятих у образованю и виєдначованє плацох у образованю з плацами у других явних дїялносцох, та вименки Закона о основох системи образованя и воспитаня. Як сообщене, тота орґанизация вимага и Новорочни награди, виманки Окремного колективного контракту за занятих у основних и штреднїх школох и домох школярох, припознаванє предходней роботи и звекшанє рочного проценту за предходну роботу.
Подполни єднодньови штрайк будзе орґанизовани у децембру, на дзень кед Скупштина будзе гласац о буджету за 2017. рок.
Министер просвити Младен Шарчевич виявел же нє видзи причину за штрайк, прето же заняти у просвити достаню найвекше звекшанє плацох – за 6,5 одсто, и поволал их на роботну схадзку на хторей би ше бешедовало о проблему технолоґийних звишкох.