РУСКИ КЕРЕСТУР – На „Одгукох ровнїни”, обновеней манифестациї Фестивалу „Червена ружа”, на хторей всоботу, 1. октобра наступели представителє зоз скоро шицких местох дзе у Сербиї жию Руснаци, алє и з Горватскей и Словацкей, пренєшени и поздрави предсидателя Сербиї Томислава Николича Руснацом и Фестивалу, хтори на соботовей вечаршей програми висловел висланїк предсидателя держави Радослав Павлович.
После привитних словох предсидателя Орґанизацийного одбору Фестивалу Желька Ковача, Павлович визначел же предсидатель Николич уважує руску националну меншину, цо видно и по тим же кажди рок з Кабинету предсидателя Сербиї у його мено дахто приходзи виражиц почитовнє.
– Крашнє видзиц як пестуєце свой скарб, язик, и то тото прецо будзеце почитовани, и прецо почитуєце сами себе. Стереотип, алє є правдиви – же Руснаци єден з бисерох, драгоциних каменьох на мапи Сербиї, на мапи Войводини. И жадам же би нашо потомки присуствовали и на 100., 105., 125. Фестивалє „Червена ружа” хтори чува нашлїдство рускей заєднїци. Щешлїви Вам Фестивал! – гварел Радослав Павлович.
У длугшей програми „Одгукох”, хтору водзели нашо познати ґлумци РНТ „Петро Ризнич Дядя” Михайло Варґа и Емил Няради, а по гумористично-сатиричним тексту Славка Ороса, з по вецей рускима народнима шпиванками и даскелїма танцами представели ше члени Дружтва Руснацох у Суботици, КУД „Петро Кузмяк” з Нового Орахова, КПД „Дюра Киш” зоз Шиду, Руского КУД „Др Гавриїл Костельник” з Кули, Руского културного центру з Нового Саду, КПД „Иван Котляревски” з Бикучу, КПД „Карпати” з Вербасу, КУД „Жатва” з Коцура, Шпивацка ґрупа „Зарї” зоз Сримскей Митровици и члени Дому култури Руски Керестур.
Тиж з вецей шиванками и єдним танцом на „Одгукох” участвовали и Руснаци з Горватскей – члени КУД „Яким Ґовля” з Миклошевцох и КУД „Яким Гарди” з Петровцох, як и Хлопска шпивацка ґрупа „Шамбринци” зоз Шамбринцох у Словакей Републики.
Як и пополадню пред тим манифестацию за дзеци, програму „Одгуки ровнїни” тиж провадзела числена публика з Керестура и других наших местох, чолнїки наших институцийох, алє и високи представителє Руснацох у Горватскей, та госци зоз Словацкей – з Попраду, Странянох, Земплинскей Теплици и представителє Русинскей оброди.
Руководителька тей манифестациї на Фестивалє була Ґабриєла Саянкович.
(Вецей фотоґрафиї з „Одгукох” уж обявени у окремней ґалериї на правим боку сайту „Руского слова” и Рутенпресу).
