ВЕРБАС – Нєшка и наютре у Вербаше ше отрима 16. Фестивал українскей култури „Калина”.
Нєшка на 16 годзин у Народней библиотеки „Данило Киш” будзе округли стол, а од 18,30 годзин у просторийох КПД „Карпати” будзе отворена вистава сликох и фотоґрафийох Тамари и Бориса Барановских. На 19 годзин почнє змагательна часц – виводзенє українских народних писньох.
Нєдзелю, другого дня фестивала, будзе представена українска кухня од 14 годзин у Центру за физкултуру „Драґо Йовович”. На истим месце, од 18,30 будзе отворена уметнїцка и етно вистава. Отверанє самого фестивала и шветочни концерт заказани за 19 годзин.
Участвовац буду УКЦ „Кобзар” з Нового Саду, КУД „Иван Сенюк” з Кули, КПД „Карпати” з Вербасу, ДНУК „Коломейка” зоз Сримскей Митровици и УКУД „Калина” з Индїї.
Госци на фестивалу УКПД „Иван Франко” з Вуковару, УКПД „Андрей Пелих” зоз Шумеча, Здруженє Українцох „Златна класка” зоз Прнявору, Союз Українцох Румуниї и госци зоз України.
У реализованю фестивалу помогли Канцелария за людски и меншински права Влади Републики Сербиї, Покраїнски секретарият за образованє, предписаня, управу и национални меншини-национални заєднїци Влади Войводини, Амбасада України и Републики Сербиї, Општина Вербас, Културни центер Вербас и Центер за физкултуру „Драґо Йовович”.