КУЛА – Тогорочни 58. Републични фестивал аматерских театрох Сербиї у Кули вчера шветочно отворела позната ґлумица Лїляна Стєпанович з Беоґраду, а пред тим фестивалски факлї опрез Културного центру (КЦ) Кула запалєл млади ґлумец-аматер з Кули Страхиня Щекич, а фестивалску заставу подзвигнул Радован Зубац, визначни ґлумец-аматер зоз Сенти.
Републични фестивал аматерских театрох Сербиї тива по 25. юний, а у змагательней конкуренциї участвую осем представи – з Червинки (чия представа „Чудо у Шарґанє” вчера одбавена перша), Рачи, Враня, Костолцу, Боґатичу/Прнявору, Беоґраду, Сенти и Старей Пазови.
Присутних на шветочним отвераню привитал директор КЦ Каменко Бертич, а на поволанку госцинскей Стєпановичовей, публика з моцним аплаузом, на стояцо, дала почесц тих дньох упокоєному познатому ґлумцови Милорадови Мандичови Мандови.
Як гварела Лїляна Стєпанович, и Манда и вона свойо ґлумеци кариєри почали як аматере, визначуюци же би без тей любови ґу аматеризму нє було анї вельких ґлумцох. Пред кулску публику на отвераню Фестивалу виведла и виривок з єй монодрами „Панї министерка”.
Осем представи у конкуренциї за награди буду оценьовац режисерка Ана Дьордєвич, драматурґиня Марина Миливоєвич Мадярев, обидва з Беоґраду и ґлумец новосадского СНТ Ненад Печинар.
Шицки представи на сцени КЦ починаю на 20 г., а Фестивал на соботу, 25. юния будзе заварти з преглашеньом побиднїкох и госцуюцу представу „Лизистрата” Театру „Пременка” з Нового Саду, у хторей ґлуми и нашей публики познати Иґор Ґрекса.
Фестивал ма и провадзацу програму, та вчера у Ґалериї Културного центру отворена вистава малюнкох Бранка Маравича, а на пондзелок и стреду (на 22 г. у Малей сали КЦ) будзе проєкция филму о недавно упокоєним познатим ґлумцови-аматерови з Червинки Винкови Ступарови, котри ґлумел у вецей местох у кулскей општини.
Фестивал орґанизую Союз аматерох Сербиї, Културно-просвитна заєднїца Општини Кула, Културни центер Кула, а з финансийну потримовку Општини Кула.