Фодбалере керестурского Русина шлїдуюцей сезони буду бавиц у квалитетнєйшей лиґи як цо бавели прешлей сезони.
Зоз зомборскей лиґи до новей реорґанизованей лиґи пласовали ше: Липар, Шикара, БСК, Младосц, Тереквеш, Русин, Борац. Ту ище Гайдук юниор (Кула), Полет (Сивец), и ЖАК (Зомбор).
Зоз бачкопаланацкей зони до новей реорґанизованей подрученей лиґи вошли: ФК „Крила країни” (Б. Паланка), КФК „Герцеґовац” (Ґайдобра), ФК „Славия” (Пиньвиц),. ФК „Стари ґрад” (Б. Паланка), ФК „Младосц” (Б. Петровец), ФК „Младеново”.
Тренер Златко Саянкович дал коментар сезони 2015/2016.
– На початку сезони догварели зме ше же пре наявену реорґанизацию лиґи потребне завжац єдно од перших осем местох у ПФЛ Зомбор хторе ґарантує уход до висшей лиґи. Тот циль зме виполнєли, дзе єшеньска часц одробена барз добре, док у ярнєй часци екипа бавела досц пременлїво, алє тельо кельо требало за зарисовани циль. На концу прешлей фодбалскей сезони Русин завжал 7. место на таблїчки дзе у 30 змаганьох ма 13 побиди, 6. раз бавел нєришено, 11 раз страцел, ґол розлика 46:52 и укнїжел 45 боди. У наиходзацим периодзе фодбалере Русина ше буду пририхтовац за наступ у новей лиґи. Пририхтованя почню 10. юлия на Ярашу, дзе пририхтованя буду по початок нового першенства. Циль нам добре ше пририхтац бо нова лиґа будзе моцнєйша и квалитетнєйша од прешлорочней. До екипи пробуєме приключиц и младших бавячох.
Од навиячох обчекуєме же би их потримали, як цо робели и потераз. Нїґдзе нє було тельо навиячох, и на Ярашу, и кед зме госцовали, як цо их мал Русин – закончел Златко Саянкович.