РУСКИ КЕРЕСТУР – Прешлей соботи, 12. януара, у просторийох Месней заєднїци отримана сновательна Скупштина Месного здруженя учашнїкох оружийних зраженьох од 1990–1999. рок на просторе дакедишнєй Югославиї. За предсидателя вибрани Славко Пап, професор у керестурскей Школи, а вибрани и други орґани Здруженя.
На Скупштини на хторей були присутни коло 30 Керестурци учашнїки войнох, вибрани и Управни и Надпатраюци одбори Здруженя, котрим предсидателє Славко Пап и Дюра Папуґа. Месне здруженє будзе часц Општинского здруженя з истим меном хторе активне уж шести рок. Општинске часц Покраїнского, а тото такого Здруженя на републичним уровню.
На Скупштини були присутни и представителє Општинского здруженя, предсидатель Ґавра Веселинович, предсидатель и член Надпатраюцого одбору Зоран Нешич и Владимир Дюровски. Вони мали и викладаня, а окреме давали информацию о тим цо Општинске здруженє ма задатки, по хторих питаньох роби и цо планує у наступним периодзе.
Як було поведзене на Скупштини, и керестурске месне здруженє як часц републичного будзе ше закладац за ришенє статусу учашнїкох воєних зраженьох. То подрозумює и витворенє коло сто їх правох одн. бенефицийох хтори им шлїдза, од борецкого додатку, воєних дньовнїцох, рижних здравствених и других олєгчаньох.
Руководство керестурского Здруженя поволує шицких учашнїкох воєних зраженьох зоз того валалу хтори у своєй Воєней кнїжочки маю уписани час од кеди до кеди участвовали у тих зраженьох же би ше учленєли до Здруженя. Треба же би ше явели спомнутим предсидательом, Папови лєбо Папуґови, за тераз у просторийох Рускей матки у Месней заєднїци.
Од документациї потребне принєсц воєну кнїжочку, фотокопию особней леґитимациї зоз хторима ше у Здруженю виполнї приступна вимога.
Як поведзене, анї нєт точна евиденция шицких учашнїкох, а нагадує ше же их єст помедзи 80 и 100 особи.
