Формовани орґани, одбори и роботни цела Националного совиту

автор саб, фото вев
606 Опатрене

НОВИ САД – Национални совит Руснацох на трецей порядней схадзки отриманей вчера у Заводзе за културу войводянских Руснацох у Новим Садзе формовал орґани, одбори и фахово роботни цела и меновал їх членох.

На схадзки на хторей були присутни 17 од 19 членох, меновани подпредсидателє Совиту, предсидатель и члени Вивершного одбору, секретар, як и предсидателє и члени одборох за образованє, културу, информованє и службене хаснованє язика и писма.

Ґу тому, Национални совит формовал и шейсц роботни цела и меновал їх предсидательох и членство. Попри окремних роботних целох за младих, спорт и науку, хтори мал и предходни Совит, пияте зволанє формовало и три нови роботни цела: за нєрухомосци, за медзинародни одношеня и традицию, и за проєкти, односно Проєктни биро. Формованє планованого Роботного цела за  демоґрафию пролонґоване за познєйше.

Национални совит принєсол и одлуку о роботним анґажованю предсидателя Совиту Бориса Сакача, цо значи же под час мандату будзе заняти у тей рускей институциї з правами и обовязками хтори припадаю тому статусу.

За подпредсидательох Националного совиту вибрани Йоаким Рац (Руски Керестур) хтори будзе и заменїк предсидателя Совиту, Зденко Лазор (Бикич) и Весна Раґаї-Цап (Коцур).

За предсидателя седемчленого (предсидатель и шейсц члени) Вивершного одбору вибрани Желько Ковач (Руски Керестур), а до членства Миломир Шайтош (Нови Сад), Микола Кухар (Дюрдьов), Стеван Самочета (Коцур), Марина Дудаш (Руски Керестур) як и Йоаким Рац и Весна Раґаї-Цап.

За секретара Националного совиту, як єдина кандидатка и єдногласно вибрана Таня Арва-Планчак, хтора тото задлуженє окончовала и у предходним зволаню Совиту.

За предсидателя Одбору за културу хтори ма єденац членох (предсидатель и 10 члени) вибрани Микола Шанта (Коцур), а до членства Деян Загорянски (Вербас), Ґабриєла Саянкович (Руски Керестур), Владимир Балащак (Сримска Митровица), Микола Хромиш (Дюрдьов),  Аранка Медєши (Коцур), Кристина Афич, Сашо Палєнкаш (Руски Керестур), Ирина Гарди Ковачевич, Мария Тот (Нови Сад) и Мирослав Ковач (Вербас).

Узвичаєно, найвекши Одбор за образованє хтори ма 13 членох, а за предсидательку вибрана Мелания Римар (Петроварадин). За членох вибрани Олена Папуґа, Єлена Сивч, Любица Няради, Емилия Костич и Каролина Папуґа (Руски Керестур), потим Ана-Мария Рац, Ксения Уйфалуши и Ксения Бенце (Коцур), Мария Самарджич (Дюрдьов), Гелена Папуґа (Вербас), Сенка Бенчик (Нове Орахово) и Нада Хромиш Аничич (Шид).

Одбор за информованє хтори ма дзевец членох, водзиц будзе предсидатель Яким Винаї (Руски Керестур), а члени Дюра Винаї (Нови Сад), Мартица Тамаш (Вербас), Ясмина Дюранїн (Сримска Каменїца), Златко Рамач (Нови Сад), Мая Зазуляк Гарди (Руски Керестур), Владимир Дїтко (Шид), Сандра Саламун (Дюрдьов) и Микола М. Цап (Коцур).

За предсидателя Одбора за службене хаснованє язика и писма хтори тиж будзе мац дзевец членох вибрани Звонко Сабо (Вербас), а члени буду Мирон Рамач, Владимир Олеяр, Владислав Салак и Мария Дорошки (Руски Керестур), Тарас Чапко, Ивана Тиркайла (Дюрдьов) и Борис Надь (Бачинци), а єдно место у тим одборе затераз остало нєпополнєте.

Попри комплетованя структури Совиту и його целох, на вчерайшей схадзки Национални совит тиж давал  думанє о дзепоєдних питаньох з компетенцийох хтори шлїдза з статусу рускей националней меншини у дзепоєдних єдинкох локалней самоуправи на подручу АП Войводини. Дате позитивне  думанє о кандидатови за директора ОШ „Бранко Радичевич” у Савиним Селу (Рахман Тиґань), позитивне думанє о назви парку у Шидзе (Парк капитана першей класи Крунослава Иванковича), як и позитивне думанє о Предлогу одлуки о мрежи явних основних школох на териториї Городу Нового Саду. Совит тиж прилапел одлуку органох Заводу за културу войводянских Руснацох хтора формалней природи, а одноши ше на пренос буджетских средствох з 2018. до 2019. року.

ПОВЯЗАНИ ТЕКСТИ