Славуй Хаджич знял вецей як 5048 новинарско-знїмательски репортажи, 496 документарни филми за Кино клуб, Неопланту, ТВ Нови Сад и ТВ Беоґрад и 12 бавени филми.
Славуй Хаджич бул новинар, знїматель, режисер, сценариста и монтажер, комплетни телевизийни и филмски творитель, єден з пионирох и доаєн свойого ремесла и уметносци у Войводини, шведок часу и бурней историї другей половки 20. вику.
Народзени є 1934. року у Вуковару, а умар 2007. року у Новим Садзе. Роснул и школовал ше у Товаришеву, а потим у Новим Садзе и Беоґрадзе. Робел за Радио-телевизию Сербиї (ТВ Беоґрад), а потим у Явней медийней установи РТ Войводини (ТВ Нови Сад). З камеру и фото апаратом обишол цали швет. Єден є з людзох хтори за живота поробели тельо же нє лєгко анї начишлїц. Барз значна його робота на фундаментованю професийней кинематоґрафиї у Войводини.
За информованє о подїйох з Войводини на РТВ Беоґрад значне порушованє хронїки „През Войводину”, хтора перше ишла як часц пиятковей емисиї ТВ новосци а после самостойно, чий вецейрочни автор праве Славуй Хаджич. Вон активно участвовал у рихтаню програми на мадярским язику, хтора рушела на ТВ Беоґрад 1968. року.
Найзначнєйши подїї, филми, знїмки, прилоги, фотоґрафиї з професийнией и уметнїцкей роботи Славуя Хаджича представени у обсяжней и богато илустрованей фото-моноґрафиї, на вецей як 500 бокох, хтора обявена у априлу того року. Моноґрафию з насловом „Живот обдумани зоз слику”, вершински професийни, алє и людски цепло, през здогадованя гевтих хтори познали, любели и почитовали Славуя Хаджича порихтала його супруга Миряна Хаджич, а видавач Артпринт медиа зоз Нового Саду.
Новини „Руске слово” медийни покровитель тей значней моноґрафиї, вєдно зоз друкованима медиями других националних меншинох у Войводини, понеже як телевизийни знїматель и режисер Славуй Хаджич знїмал и афирмовал шицки фестивали, културни и други подїї шицких националних заєднїцох у Югославиї, Сербиї и Войводини, та и манифестациї Руснацох и през свою роботу сотрудзовал з Руснацами хтори зоз свою роботу вязани за медиї, филм и други обласци култури.
На боку 178. фотоґрафия зоз знїманя репортажи о малярови Сави Стойкову на хторей ше находза: Стеван Чесаров, Весна Вишошевич – Фекете, Сава Стойков и його супруга Барбара, Славуй Хаджич, Мирон Бесерменї и Ян Шимо
Моноґрафия „Живот обдумани зоз слику” ма 18 поглавя зоз стотками сликох, хтори попри живога и дїла Славуя Хаджича описую и розвой филмского новинарства, документарного филма и телевизиї у Войводини, Сербиї и Югославиї.
На самим початку моноґрафиї його „Прилоги за биоґрафию”, текст хтори Славуй Хаджич написал ище 1994. року, а потим шлїдза ище 17 поглавя зоз написами фаховцох зоз обласци фотоґрафиї, филма и медийох о його творчосци у обласци фотоґрафиї, филма и филмскей репортажи, його роботи у телевизиї Беоґрад и ТВ Нови Сад, здогадованя. Професийни розвой и успихи Славуя Хаджича документовани зоз вибором зоз преси, зоз податками зоз обласци филмоґрафиї, толкованьом штирох биоґрафских филмох и емисийох о Славуйови, начишльованьом наградох хтори достал и установйованьом Награди Славуй Хаджич 2007. року. Кнїжка понука и богату библиоґрафию и индекс особних менох.
Нє легко анї часточно начишлїц мена славних особох хтори у тей моноґрафиї писали о Славуйови Хаджичови. Медзи иншим то: Чедомир Попов, Ференц Деак, Душан Попович, Сава Стойков, Трифу Дору, Радослав Златан Дорич, Милица Радакович, Єлиц Бєли, Кароль Вичек, Йосип Бабел, Раша Попов, Радивой Шайтинац, Перо Зубац, Вера Зарич, Милутин Ж. Павлов, Лука Хайдукович, Мирослав Радонїч, Бела Дуранци, Миодраґ Петрович, Лазар Чурчич, Милан Белеґишанин, Владислав Урбан, Люба Вукманович, Душко Боґданович, Захариє Трнавчевич, Каменко Катич.
Госцованє Сербского народного театра з Нового Саду у Праги 1967. року. На фотоґрафиї Станоє Душанович, Франя Живни, Драґутин Колєсар, Славуй Хаджич, Йован Путник и Иван Хайтл
У своїх здогадованьох на Славуя Хаджича Слободан Будаков, новинар и перши директор ТВ Нови Сад написал же „кед дахто будзе правиц филмску историю Нового Саду, Войводини, Сербиї и швета, мено Славия Хаджича нєзаобиходне.
– Пришол 1976. року до ТВ Нови Сад, а уж 1977. року на Фестивалу у Порторожу освоєл специялну награду за камеру за документарац „На пажицох Хенри Мура”. Истого року маестрално зазначовал путованє зоз камеру по городох и джунґлох Южней Америки зоз Владимиром Ракичом и Тибором Секельом. Вецей роки репризовани тоти емисиї и предати су велїм телевизийом у швеце. Кед Новосадски отворени универзитет 1988, року отворел Новинарску школу, поволал сом даскельо найискуснєйших новинарох ветеранох же би тримали преподаваня, а медзи нїма и Славия Хаджича за филмске новинарство. Вон то найлєпше знал. Вон поучовал нащивительох школи як ше прави филмска вистка, филмски звит, репортажа та и филмски коментар, а шицко тото уключує и слику и текст и монтажу и режию – написал Будаков.
Сава Степанов, подобови критичар, написал же уж на початку интересованя за фотоґрафию Славуй Хаджич указал вельки талант. Як седемнацрочни ґимназиялєц, зоз вельку сиґурносцу прави даскельо добре компоновани пейзажни фотоґрафиї. На першей значнєйшей вистави, на Першей покраїнскей вистави уметнїцких фотоґрафох фотоаматерох Войводини у Новим Садзе 1951. року медзи фотоґрафиями 56 авторох, жири наградзує Славуйов „Истовар на Дунави” зоз трецу награду.
О успихох Славия Хаджича як члена новосадского Кино клуба и його доприношеню найплоднєйшого и найзначнєйшого периоду аматерского филма у Войводини, як и о успишним и продуктивним тандему Хаджич – Бранко Милошевич писал професор Милорад Мика Путник. Його филмски прилоги обявени 1957. року на Першим интернационалним фестивалу аматерского филма у Кану.
Режисер и професор на Академиї уметносци у Новим Садзе Боро Драшкович гварел же даєдни жеми перше препутовал так же патрел прилоги Славуя Хаджича и вец кед стварно до нїх пошол, слики зоз репортажох го водзели на найзначнєйши места у тих жемох.
Каменко Катич за Славуя Хаджича гвари же бул институция, бо тото цо тераз робя стотки людзох дакеди, як дописователь ТВ Беоґрад з Войводини робел сам Славуй Хаджич.
Новинар Петар Савкович написал за Славуя Хаджича же винїмково правел висти о подїйох, дзе до минути-двох треба змесциц цалу подїю, за цо попри знїмательского и новинарского знаня треба и схопносц, знаходлївосц, способносц на швидко оценїц ситуацию. Славуй Хаджич за свойо роботи достал вкупно 69 награди и припознаня. У „Прилогох за автобиоґрафию” Славуй Хаджич написал же му найвекша награда же за шицок час хтори препровадзел на роботи на филму и телевизиї, обучел вельке число асистентох камери, режиї и монтажи, хтори як и вон дакеди, полюбели тоту уметносц, постали самостойни творителє, авторе познатих дїлох.
По одлуки Управного одбора РТВ Войводини од 26. октобра 2007. року установена награда хтора ноши його мено. Награду Славуй Хаджич додзелює ше як знак здогадованя на винїмкову особу Славуя Хаджича, єдного з пионирох и доаєна филмского и телевизийного новинарства у Войводини. Додзелює ше ю раз у року, за Дзень РТВ Войводини, 29. новембра найеминентнєйшим творительом за їх вкупну авторску творчосц, а у 2013. року Награду Славуй Хаджич достал новинар и редактор Михал Рамач.
Михал Рамач 2013. року достал Награду Славуй Хаджич
Авторка моноґрафиї Миряна Хаджич, професийно ше занїмала зоз информатику, була директорка рахункарского центра Юґобанки Нови Сад, потим Континентал и НЛБ банки, о пририхтованю моноґрафиї гутори:
– Живот зоз филмским творительом, слуханє, ученє и розуменє роботи зоз хтору ше занїма Славуй Хаджич, и моя робота информатичара повязани зоз виглєдованьом и систематизованьом податкох, допринєсли же моноґрафия о Славуйови Хаджичови так написана же читачом олєгчує провадзиц розвой нових медийох, крочайох у розвою филма, и пионирски крочаї на телевизиї у другей половки 20. вика, и на початку нового милениюма – гутори Хаджичова.