КАЗИНЦБАРЦИКА/МУЧОНЬ (МАДЯРСКА) – Наш визначни просвитни роботнїк, новинар, публицист и наукови виглєдовач Мирон Жирош (1936-2016), котри ше упокоєл вчера, 29. новембра у Мадярскей, дзе жил остатнї роки, будзе поховани на пияток, 2. децембра на 14 годзин на теметове у Мучоню, у Мадярскей, дознава Рутенпрес.
Телеграми сочувствия фамелиї упутел и Национални совит Руснацох, а як дознава Рутенпрес, представителє Националного совиту буду присуствовац и на випровадзаню Мирона Жироша на його остатню драгу, у Мучоню.
Мирон Жирош народзени 1936. року у Руским Керестуре, а после роботи у школох у Дюрдьове и Керестуре, роботи у привреди у Керестуре, а найвецей у новинарстве, у Радио Новим Садзе, од пензионованя жил у Казинцбарцики у Мадярскей. И под час роботи и як пензионер, свойо публицистични, историйно-виглєдовацки и други твори обявйовал у наших медийох, публикацийох, лєбо як окремни кнїжки.
Зоз шмерцу Мирона Жироша руска национална заєднїца у Сербиї страцела єдного з найвизначнєйших културних и наукових дїячох, чийо мено уж вецей децениї уписане до фундаментох нашей привредней и културней историї.