Велї нє верели же би Доналд Трамп могол буц вибрани за предсидателя Зєдинєних Америцких Державох, алє заш лєм, то ше случело. Тиж так мало хто думал же у Болгарскей на виберанкох за предсидателя победзи кандидат хтори до виберанкового змаганя убегнул просто зоз войска и полуанонимни є у политичних кругох. На парламентарним уровню, завлоньским, подобна бешеда була и за Сиризу у Греческей, алє ниа, тота „ нєозбильна и прерадикална лївица” нєшка на власци. З другого боку, у нашей жеми велї думали же рух „Досц було” нє прейдзе цензус, а з парадиґматского Любиши Прелетачевича Белого ше вишмейовали як з добрей франти на рахунок домашнєй политичней сцени. Тераз, ем Радуловичово у националним Парламенту, ем Бели на чолє другей по велькосци одборнїцкей ґрупи у општини Младеновац. На гевтим цмейшим боку политичней сцени, ширцом Европи маме змоцньованє националистох хтори за велї проблеми у дружтве предкладаю радикални ришеня котри маю мало вязи зоз 21. виком, цивилизованим справованьом, гуманима и гражданскима вредносцами, та и здравим розумом.
Кед би таки приклади було менєй, могло би повесц же то лєм винїмки, алє з оглядом на тото же кельо раз людзе у рижних державох обрацели хрибет професийним политичаром и здирветому естаблишменту хтори им роками, менєй лєбо вецей, приповедаю исти приповедки, од хторих ше мало цо витворює у пракси, то уж нє винїмки, алє дацо цо годно постац правило. Людзом досц естаблишменту и жадаю цошка нове, дакого хто нє компромитовани, до кого годни вериц и хто будзе їх нова надїя за лєпши живот. Голєм док их и тот нови нє знєвери…
Е тераз, якей то ма вязи зоз нами? Ма, и то велькей, понеже нас найпознєйше нарок у маю чекаю виберанки за предсидателя Сербиї. Гоч функция предсидателя у нашей жеми, менєй-вецей, протоколарна, нєписане правило нашого политичного живота гвари же хто траци место предсидателя Сербиї, на шлїдуюцих виберанкох траци и векшину у републичней Скупштини. Того свидоми и власц и опозиция, лєм же владаюци странки у лєгчейшей и безпечнєйшей позициї, бо опозиция у тей жеми така яка є – розєдинєна, повадзена, суєтна и лїха.
Лидере ше сходза, радза, шицким полни уста того же опозициї нєобходни єдинствени кандидат. Медзитим, нїхто ище нє назберал шмелосци и припознал же шансу будзе мац лєм особа хтора потераз нє була у политики, нє компромитована є, и нє розцагована по медийох. И на концу концох, особа хтора дотераз нє вишла народу на верх глави. Кед ше спатри шицко цо ше остатнї час случує у швеце, „швижа крев” можебуц ризична опция, алє вироятно єдина хтора може дац резултат.
Становиска висловени у тим тексту виключно авторово и нє вше одражую ушорйовацку политику новинох „Руске слово”.