КОЦУР – Члени Церковного одбору коцурскей грекокатолїцкей церкви Успения Пресвятей Богородици вчера, 29. новембра, орґанизовали роботну акцию у загради старей парохиї.
У розкерчованю велькей поверхносци парохиялней загради одборнїком ше приключел и парох коцурски о. Владислав Рац. Як гварел, мило му же одборнїки пришли, же ше роби з дзеку и же робота идзе.
– То вельки простор, и уж бул час лапиц ше и до того. Пошорена єдна часц загради, плануєме ище роботни акциї же би ше ограда од сушедових цалком упристоєла и же би то крашнє випатрало – визначел о. Владислав Рац.
Шицки присутни одборнїки ше зложели же з добру дзеку, змиреносцу и злогу мож, наисце, вельо зробиц.