„Нє була вона такой така подла (у своєй роботи)” – гинто зме ше раз пригадовали з колеґом нашей (уж длужей усопшей) шефовици на Мултирадию – Енике Галас ше волала, за котру зме во-время-оно вєдно робели.
„Главна/основна хиба єй була же фаворизовала полтронох наспрам роботнїкох”, доложел мудро колеґа, а мнє ше тот заключок нєраз гнєтка потим врацал з паметаня. И най лєм доложим слова єдней персони з фамелийного сениорату, ещи з часу „транзицийних” дзеведзешатих; „Шицки би тарґовиц, а нєт хто продуковац”.
Патрим та думам, як раз хтошка зоз заєднїци зґодно формуловал тоту конструкцию, парафразуєм – Но та, покля би була гранїца отримуюцосци такого єдного (полтронского) баласту цо паразитує на рахунок обезправеней (без) роботней векшини. Бо, як ше ми видзи, а до процивного ме нїхто вецей нє може прешвечиц, думам же помали приходзи чорт по свойо; улїжнїцтво постало модел за подмасцованє там дзе подруци звичайно професийна компетенция, напр. антикоруптивни державни мири подруцели цалком, зна ше констатовац з велїх явних местох и форумох фаху. Прирва медзи политичну праксу и реалносцу як таку вше очигляднєйша. Яки ви маце, кед вообще же маце евакуацийни план, чи уж вам будзе (лєпше) як будзе?
Кед же дакому нєясне о чим я то, но, га, патрим на конкурси за койяке вонкашнє сотрудзованє за одрабянє роботох у подприємствох дзе привилеґовани заняти, пать чуда! – якош траца професийну компетенцию. Алє, гей, синекури стаємней занятосци то цошка без чого нє мож. Таки модел дружтвеного функционованя характеристични за жеми трецого швета, з хторого ше держава нам котрей припадаме, якбачу анї нїґда нє позбула.
Наприклад – Културни центер Нового Саду (най обкеруєм чувствительни терен заєднїци, а спомнєм цошка безпечнєйше, а особнє оджите). Дакедишня аванґардна Трибина младих, постала филияла Бешеди, гей, гевтей ортодоксней, а буквално. Боїм ше же то покалїчени модел як ше здраве зна зашнїциц, а ми вец з нїм реґресивно правиме колективни даскельо крочаї назад. Перспектива сербского дружтва нау-а-дейз…
Становиска висловени у тим тексту виключно авторово и нє вше одражую ушорйовацку политику новинох „Руске слово”.