НОВИ САД – На шветочносци з нагоди означованю 25-рочнїци снованя Лиґи социялдемократох Войводини (ЛСВ), вовторок, 14. юлия, предсидатель Лиґи Ненад Чанак виявел же Войводини нє треба нєзависносц, алє иншаке положенє у Сербиї.
– Ми маме єдну державу и вона ше вола Република Сербия и у тей Сербиї Войводина муши пренайсц свойо положенє. Войводини нє треба нєзависносц, алє Войводянє, шлєбодни людзе котри можу одлучовац о своєй судьби. То добре за Сербию, то добре за Войводину – гварел Чанак и додал же Войводина муши мац похребцину, свойо мено и презвиско, а же би нє була сиверна сербска, южна мадярска, лєбо восточна горватска покраїна.
Заменїк предсидателя ЛСВ Боян Костреш гварел же Устав Сербиї подли, як и же є нє писани у интересу Войводини.
– Шицок пенєж хтори ше зароби у Войводини ма ту и остац – гварел Костреш, а повоторел и нєпреривне закладанє тей странки же Войводина муши мац законодавну, судску и вивершну власц, маєток и жридлово приходи, цо треба реґуловац з новим Уставом.
На означованю 25-рочнїци снованя ЛСВ, медзи другима, присуствовали и бувши предсидатель держави Борис Тадич, предсидатель Скупштини Войводини Иштван Пастор, предсидатель Покраїнскей влади Боян Пайтич, амбасадор Чарней Гори у Сербиї Бранислав Мичунович, як и госци з приятельских партийох Лиґи з Босни и Герцеґовини, Чарней Гори и Горватскей.
З тей нагоди Ненадови Чанкови уручени и Орден чарногорскей застави першого ступню, у складзе з Указом предсидателя Чарней Гори Филипа Вуяновича. Пред Чанком, тот орден достал и покойни премиєр Зоран Дїндїч.