ДЮРДЬОВ – Вчера вечар у дюрдьовским КУД „Тарас Шевченко” отримана промоция кнїжки „Наша (моя) церква” др о. Романа Миза. У мено спомнутого КУД, як орґанизатора промоциї, присутних привитал модератор Яким Чапко, а о кнїжки бешедовали єй рецезент Микола Шанта, историчар Саша Сабадош, як и сам автор.
Уводни слова, роздумованя и становиска бешеднїкох заинтересовали присутних, та з публики було надосц питаня о церкви як будинку и церкви у чловекови, о вири, розликох у вирох, алє и дзепоєдних нєдошлїдносцох.
На промоциї були и дюрдьовски парох о. Йоаким Холошняй и капелан о. Михаил Холошняй котри ше тиж уключели до розгварки, а одвитовали и на питаня поставяни з публики о дзепоєдних нєясносцох, релиґиї, обрядох у грекокатолїцкей церкви.
На концу стретнуца заключене же би сходи з отворену дебату о церкви и вири требало частейше орґанизовац, бо то гражданох интересує. Др о. Роман Миз шицких присутних поволал и на промоцию тей кнїжки у Беоґрадзе, у септембру на Коларцу.
У просторийох Дружтва писутни могли купиц представяну кнїжку, алє и виданя НВУ „Руске слово”.