РУСКИ КЕРЕСТУР – Тогорочни 55. Фестивал рускей култури „Червена ружа” у Руским Керестуре будзе од 24. по 26. юний, потвердзене на вчерайшей схадзки Орґанизацийного одбору Фестивалу, на хторей члени упознати и з Правилїнком о Фестивалу рускей култури „Червена ружа” принєшеним на Управним одборе Дому култури.
На вчерайшей схадзки меновани и Програмни одбор „Ружи”, а новосц тогорочней же знова будзе уведзена манифестация „Одгуки з ровнїни”, на хторей наступя музично-танєчни секциї дружтвох з наших местох. Предвидзене же тота програма будзе на пияток, 24. юния, после дзецинскей манифестациї „Червене пупче”, односно отвераня вистави.
Фестивал и того року будзе мац и спортску и привредно-туристичну часц, понеже на соботу, 25. юния у и коло Дому ремеселнїкох будзе Керестурски саям, пошвецени старим ремеслом, а у спортскей гали Медзинародни турнир у одбойки. Керестурски саям Фестивал орґанизує у сотруднїцтве зоз Здруженьом ремеселнїкох и приватних поднїмательох и Здруженьом женох „Байка”, а Медзинародни турнир у одбойки з Месну заєднїцу и Школу „Петро Кузмяк”, зоз хтору, як и дотераз, плановане сотруднїцтво у шицких сеґментох Фестивалу.
Всоботу вечар будзе Шветочни концерт, на хторим предвидзени репрезентативни „руски блок”, наступ госцуюцого иножемного ансамблу, як и єдного естрадного, а понеже Закарпатски обласни хор з Ужгороду одказал наступ на „Ружи”, тих дньох будзе познате мено иножемного анасамблу, як и єдней познатшей оркестри з нашей жеми за Естрадни концерт.
Понеже на конкурс за нови композициї у забавним духу сцигли барз мало квалитетни композициї, того року вироятно нє будзе їх змаганя на манифестациї „Червена ружа”, так же на нєдзелю, 26. юния, после змаганя младих шпивачох за найкрасши глас, найвироятнєйше будзе орґанизована окремна ревиялна музична часц тей манифестациї.
Як догварене на вчерайшей схадзки, детальнєйши порядни и провадзаци змисти „Червеней ружи” буду утвердзени по законченю Драмского мемориялу.