„Червена ружа” 1. и 2. октобра

автор зам
1k Опатрене

РУСКИ КЕРЕСТУР – Тогорочни 55. Фестивал рускей култури „Червена ружа”, хтори мал буц отримани од 24. по 26. юний, алє є одказани пре нєсподзиванє упокоєнє Юлияна Рамача Чаму, будзе отримани на єшень – 1. и 2. октобра у Руским Керестуре, а програми „Ружи” буду у Спортскей гали – заключене на вчерайшей заєднїцкей схадзки Орґанизацийного и Програмного одбору Фестивалу.

У двох дньох, соботу и нєдзелю, буду отримани шицки предвидзени манифестациї Фестивалу, крем Естрадного концерту, а о новим терминє отримованя „Ружи” буду поинформовани плановани учашнїки шицких манифестацийох ище за перши термин отримованя, котри би орґанизаторови – керестурскому Дому култури – цо скорей мали потвердзиц свойо участвованє у нових терминох.

Як порадзене на вчерайшей схадзки, на соботу, 1. октобра, будзе отворена вистава и  отримани манифестациї „Червене пупче” и „Одгуки з ровнїни”, а на нєдзелю, 2. октобра, „Червена ружа” – змаганє за найкрасши глас, а потим Шветочни концерт.

Як поведзене, шицки програмни змисти за тогорочни Фестивал були пририхтани за першобутни термин, у їх пририхтованю у барз велькей мири участвовал и Юлиян Рамач Чамо, так же його робота будзе предлужена.

На схадзки розпатрани и дзепоєдни деталї вязани за прилагодзованє програмних змистох новому термину, а оформена и окремна Технїчна комисия хтора спатри шицки потребни условия за отримованє Фестивалу у Спортскей гали.

ПОВЯЗАНИ ТЕКСТИ