РУСКИ КЕРЕСТУР – У рамикох Дзецинского тижня, хтори будзе закончени нєшка, у Руским Керестуре отримани числени активносци за шицки возрости школярох у Школи „Петро Кузмяк” и за дзеци у дзецинскей заградки „Цицибан”.
Так вчера школяре нїзших класох у школским голу пририхтали виставу бавискох, хтори пред тим дзень правели на роботнї вєдно зоз школярами 7. класох, а висши класи патрели филм з тему фамелиї.
Штредньошколци-матуранти з интернату вчера з представителями Червеного крижу мали мотивацийну роботню о добродзечним даваню креви, а дзень пред тим Червени криж за шицки класи орґанизовал преподаванє о родно заснованим насилстве.
Школяре 1. класи Ґимназиї з руского оддзелєня вчера у школским голу отримали мини-концерт за своїх парнякох, а на хторим зберани и дробни школски прибор за дзеци без родичох з Доме у Зомборе.
У рамикох Дзецинского тижня и Мешаца старших особох, часц штредньошколцох котри у школи слухаю грекокатолїцку виронауку вчера нащивела старих у Каритасу. На тим друженю предпремиєрно пущени и шпиванки з нового компакт-диску „Керестурски штири дзвони”, хтори виводзи Хлопски квартет Дому култури.
Нєшка шицки школяре Школи буду мац крос, а за школярох од 5. по 8. класу у Диску „Амадеус” будзе диско-вечар, хтори будзе мац и гуманитарни характер.
У дзецинскей заградки „Цицибан” вчера предшколски дзеци правели маски з еколоґийних материялох, а потим вєдно з дзецми младших воспитних ґрупох мали друженє и бал под масками. Дзецински тидзень у „Цицибану” нєшка будзе закончени зоз спортскима активносцами.
