ШИД – Предсидателька Скупштини општини Шид Наташа Цвєткович и помоцнїца предсидателя Општини задлужена за социялни питаня Биляна Крч вчера нащивели Здруженє за потримовку родичом дзецох з окремнима потребами „Отворене шерцо”, хторе ше находзи у просторийох Лєтнєй владическей резиденциї.
Причина за нащиву було спатранє функционованя предлуженого пребуваня дзецох як тромешачного проєкту у рамикох явних роботох, а финансує го Национална служба за обезпечованє роботи.
Роботу достали и два виховательки, котри ше кажди роботни дзень од 12 до 15 годзин стараю о дзешецерих и вецей дзецох з окремнима потребами зоз Шиду, а на вчерайшим стретнуцу присуствовал и шидски парох о. Михайло Режак.
Предсидателька Цвєткович обецала же ше будзе закладац за обезпечованє средствох у општинским буджету же би нарок предлужене пребуванє за дзеци з окремнима потребами робело поряднє.
Цвєтковичова и Крчова дзецом принєсли печаци, кнїжки за фарбенє, колажни и обични теки, почасцели их и зоз пицу, а дзеци им подаровали новорочни венчики и рисунки хтори сами виробели.
