ШИД – Зоз Шветочну академию, вчера вечар у Руским доме у Шидзе означене националне швето Руснацох у Сербиї.
Програма була преткана з историйнима фактами – од приселєня Руснацох на тоти простори по нєшкайши днї.
Понеже Културно-просвитне дружтво „Дюра Киш” влонї означело ювилей – 95 роки постояня – и тота шветочна академия була нагода за здогадованє на културно-просвитни живот Руснацох пред Другу шветову войну, та по нєшкайши днї.
През пречитани виривки представена и робота секцийох и визначни културно-просвитни дїяче котри зохабели шлїд при Руснацох.
З венчиком руских шпиванкох програму збогацела Младша шпивацка ґрупа, а на видео-биму приказовани фотоґрафиї з прешлосци по нєшкайши днї.
Попри Руснацох зоз Шиду, членох Националного совиту (НС) Руснацох и його орґанох, подпредсидательки НС Наташи Еделински и наших священїкох – о. Михайла Режака и о. Владимира Еделинския Миколку, на Шветочней академиї присуствовал началнїк Општинскей управи Шид Ромко Папуґа и представителє КУД-ох других националних заєднїцох зоз Шиду.
