КУЛА – З нагоди 1. октобра, Медзинародного дня старших особох, вчера у Доме за старих и пензионерох у Кули отримана пригодна културно-уметнїцка програма, хтору вєдно з хаснователями Дому пририхтали школяре з ОШ „Иса Баїч”.
Шветочносц отворел директор Дому Ранко Шпанєвич, котри гварел же, попри означованя Медзинародного дня, у кулскей општини цали октобер традицийно пошвецени старим, так же у Доме за старих и пензионерох у Кули и його Оддзелєню у Руским Керестуре буду отримани рижни манифестациї и друженє хасновательох з дзецми з предшколскей установи и основних и штреднїх школох.
На вчерайшей програми присуствовали и предсидателька Скупштини општини Кула Снежана Мркаич, директорка Центру за социялну роботу Ґордана Вакула, представителє кулских основних и штреднїх школох, Червеного крижу и други госци.