НОВИ САД – Всоботу, 19. новембра вечар, у театралней сали новосадскей Ґимназиї „Лаза Костич” Руски културни центер (РКЦ) зоз Шветочним концертом „РКЦ 70 роки з вами” означел свою 70-рочнїцу постояня. На шветочносци присуствовали и народна посланїца у Скупштини Сербиї Олена Папуґа, предсидатель Националного совиту (НС) Руснацох Славко Рац, преосвящени владика Георгий Джуджар, о.д. директора Заводу за културу войводянских Руснацох Ивана Дудаш, заменїца городского началнїка за културу Зорица Шияк, члени НС и числена публика, а госцох и присутних привитала директорка РКЦ Наташа Макаї Мудрох.
Винчуюци ювилей Олена Папуґа визначела же новосадски аматере єдини робя у нєвигодних условийох, а з резултатами своєй роботи то нє заслужую, та би требало робиц на тим же би ше условия у новосадским РКЦ цо скорей злєпшало. Владика Георгий Джуджар гварел же шицки тоти цо през 70 роки участвовали у роботи того дружтва нас потомкох задлужели предлужиц чувац тоту традицию и пожадал же би РКЦ и надалєй бул розсаднїк култури, а и вєдно з церкву чувар националного идентитету Руснацох.
Привитуюци шветочносц и винчуюци ювилей, предсидатель НС Славко Рац окреме визначел же у 70-рочней роботи РКЦ було вельо поєдинцох, а аматерска робота ше вше опера на поєдинцох. Прето тот ювилей повинчовал и бувшим и терашнїм заслужним поєдинцом котри зоз свою нєсебичну роботу зачували нашу руску традицию.
У програми участвовали шицки секциї РКЦ – Хор „Гармония”, Фолклорни ансамбл, Дзецински хор, Дзецинска фолклорна ґрупа, Хлопска шпивацка ґрупа, Женска шпивацка ґрупа, Оркестер (и зоз солистку Катарину Кочиш), а секциї представени и з кратшу историю и їх дакедишнїма и терашнїма руководителями. На лед-панелу на бини богата история РКЦ указана и з фотографиями.
После програми, друженє аматерох и госцох предлужели у просторийох РКЦ.