ШИД – По податкох Индексу дружтвеного розвою городох и општинох Тиму за социялне уключованє и зменшанє худобства при Влади Републики Сербиї, Шид спада до штреднє розвитих општинох, медзитим, спрам доступних фактох, баржей спада ґу слабше розвитим. Општина позитивно оценєта по безпечносци, почитованю людских и меншинских правох, дружтвеней партиципациї, док условия за еґзистенцию нє на завидним уровню.
Плаци нїзши од републичного просеку и виноша 34 530 динари, цо за коло 10 000 менєй од штреднєй нето плаци у Републики Сербиї. Процент високообразованих гражданох два раз менши од просеку, гоч трошки за образованє по жительови виноши 11 785 динари.
Обласц здравства и здравственей защити нєвигодна, найбаржей пре нєдостаток кадрох, цо ше указало як проблем и у других, вельо розвитших општинох.
Як наведзене у Индексу розвою, у Шидзе барз вигодни условия биваня, понеже 92,33 одсто ґаздовствох прикапчане на водоводну, а 48,90 одсто на канализацийну мрежу.
Индекс дружтвеного розвою облапя шицки городи и општини у Републики Сербиї и раз рочнє ше го ажурира з новима податками.