На швето Покрова Пречистей Дїви Мариї у Шидзе отримана шветочносц з нагоди отвераня обновених просторийох у будинку Лєтнєй владическей резиденциї.
Шветочносц у Шидзе почала з молебеном до Пречистей Дїви Мариї хтори у церкви Преображеня Господнього служел апостолски еґзарх за грекокатолїкох у Сербиї кир Георгий Джуджар, а сослужели о. Владислав Варґа, о. Дарко Рац, о. Владимир Еделински Миколка и домашнї парох и декан сримски о. Михайло Режак.
У казанї владика привитал шицких у церкви, а окреме Даниєлеа Бомбардия, хтори бул присутни у мено донатора средствох Владическей конференциї Италиї и Каритасу Италиї, потим привитал и представнїкох Каритасу Сербиї, паноцох, монахинї, представнїкох локалней власци и других.
Кир Георгий гварел же ше пошвеца и шветочно отвера просториї хтори хаснує Предшколска установа „Єлица Станувукович Шиля” вецей як 40 роки, у найстаршим и найкрасшим будинку у Апостолским еґзархату, хтори доминує у Шидзе.
ПОДЗЕКОВНИ ЗА ДАРИ
– Пречиста Дїва Мария, хтора и наша мац, охранює нас и заступа у нашим живоце и у наших потребох. Ту зме же бизме през молитву указали любов нашей Нєбесней мацери и подзековали за єй дари, за єй покров над нами – гварел кир Георгий.
Владику и шицких присутних привитал домашнї парох о. Михайло Режак. На молебену вєдно шпивали шицки вирни, помагали и чесни шестри Служебнїци, а бул и дакедишнї парох у Шидзе, а тераз парох у Руским Керестуре о. Михайло Малацко. На шветочносци присуствовал и Славко Рац, предсидатель Националного совиту Руснацох.
После молебена у просторийох Резиденциї у „Отвореним шерцу” отримана конференция за новинарох, хтору водзела Анита Ґовля, координаторка Каритасу у Новим Садзе.
– Мило ми же сом на єдней такей значней подїї и же зме перше з молитву подзековали за помоц и благослов нашей Богородици, алє и добродїйом хтори помогли обнову, Владическей конференциї Италиї, Каритасу Италиї, локалней самоуправи у Шидзе, алє и майстром хтори робели на обнови. Найзначнєйше то же тот будинок полни животу, же ше вше дацо збува, же ту до дзецинскей заградки децениями ходза дзеци и же будинок вше вецей достава нови змисти, як за дзеци так и за младих и старших – визначел з тей нагоди кир Георгий.
У мено Владическей конференциї Италиї и Каритасу Италиї Даниєле Бомбарди здогаднул же у Италиї владичество у Аґредєнту тиж виложене приходу миґрантох и же вони препознали проблеми и спокуси у хторим ше находзи општина Шид пре миґрантску кризу, и прето одлучели помогнуц.
– Спрам наших можлївосцох, жадали зме помогнуц, же би у тим будинку було места за волонтерох хтори робя з миґрантима, а наш проєкт под слоґаном „Бул сом странєц и прияли сце ме”. Жадаме помогнуц миґрантом на тим подручу, алє и домашнїм жительом и хасновательом того прекрасного будинку – гварел Даниєле Бомбарди.
Отец Владислав Варґа, директор Каритасу Сербиї наглашел же є барз щешлїви же донаторе препознали потребу того реґиону и Шиду хтори ше зочели з миґрантску кризу.
– Окрем значней донациї до обнови будинку Лєтнєй владическей резиденциї, донаторе з Италиї тиж финансовали отверанє сучасней кухнї за миґрантох у Крнячи при Беоґраду. Прето маме вельку подзековносц Владическей конференциї Италиї и Каритасу Италиї, бо и скорей помагали нашому Апостолскому еґзархату, односно нашим парохийом у Руским Керестуре и Коцуре, алє и у других штредкох – гварел о. Варґа.
РЕПРЕЗЕНТАТИВНЕ ЗДАНИЄ
Слова подзековносци у мено локалней самоуправи виповед Драґан Ґутич, член Општинскей ради.
– Слово о репрезентативним зданию и локална самоуправа ма добре сотриднїцтво зоз грекокатолїцку церкву и парохию у Шидзе, а тиж и ПУ„Єлица Станивукович Шиля”. Резиденция, або „Руски двор”, як ю народ вола, и символ мултиетнїчносци и мултиконфесийносци, зоз хторима ше цешиме – гварел Драґан Ґутич.
Бешедовали и Ромко Папуґа, началнїк Општинскей управи, Ясмина Варґа, директорка ПУ „Єлица Станивукович Шиля” и Елемир Джуджар, координатор Каритасу за грекокатолїкох у Сербиї хтори наглашел же вон углавним бул задлужени за роботи з майстрами и же роботи на обнови добре покончени.
У голу просторийох дзецинскей заградки владика ище раз подзековал и наглашел же дзелї радосц зоз шицкима хтори пришли на тоту шветочносц и же найзачнєйше же заєднїца жива, будзе хто хасновац будинок и же шицки ту прияти отвореного и щирого шерца. Вон подзековал и домашньому парохови о. Михайлови Режакови на його труду.
После того ушлїдзела кратша молитва и обряд пошвецаня обновених просторийох, хтори пошвецел преосвящени владика. За шицких госцох кратку програму порихтали зоз виховательками и виведли наймладши, односно дзеци зоз дзецинскей заградки хтори шпивали, рецитовали и танцовали. Представел ше и шпивацко-музични трио Наташа Еделински Миколка, Михаел Ґовля и Далибор Болдиш, хтори одшпивали „Вежнї зайду” и „А на гори”.
Кратки реферат з историї владическей резиденциї, цо вона представя нєшка и яки плани у будучносци, пречитал Зденко Лазор, а потим шицки вєдно поопатрали обновени просториї и на концу ше предлужели дружиц на коктелу.
ВЕЛЬО ПОРОБЕНЕ
З помоцу донациї Владическей конференциї Италиї и Каритасу Италиї, до будинку уведзене сучасне зогриванє, реновирани просториї хтори хаснує дзецинска заградка, направена нова кухня и санитарни ґузел, пременєти тишлїрски виробки и направени нови ґарадичи зоз нука и з вонка. Локална самоуправа у Шидзе помогла з финансованьом набавки таркет патосу до дзецинскей заградки.
Циль обнови будинку же би то бул Волонтерски центер и же би ше го под час тирваня миґрантскей кризи хасновало за змесценє волонтерох и особох хтори каждодньово помагаю миґрантом, алє и же би ше розвивало социялни програми, давало помоц, як и за змесценє нащивительох шидскей општини.
Каритас Апостолского еґзархату вєдно з парохом и деканом сримским о. Михайлом Режаком, найвецей були анґажовани на реализациї проєкту реновираня, наглашене на шветочносци пошвецаня и отвераня.