Шицки жиєме у цесних ципелох

автор сен
1k Опатрене

РУСКИ КЕРЕСТУР – Судьба роботнїкох котри жертви нєуспишних приватизацийох и политичних „бавискох“, була тема представа „Живот у цесних ципелох“ Душана Ковачевича, у режиї Ани Илич, хтору вчера вечар на Драмским мемориялє Петра Ризнича Дядї виведли ґлумци Дому култури Сивец.

Наслов символично поручує же велї людзе „жию у цесних ципелох”, односно же скоро нїкому у терашнїм чаше у живоце нє лагодно. Текст представи написани пред двома роками и приказує терашнї дружтвени проблеми хтори залапели велї општини, окреме кулску. То приповедка о роботнїкох бувшей фабрики обуї котри штрайкую з гладом, бо им то єдини способ же би обрацели повагу на условия у хторих ше нашли.

През приповедку прецагнути и проблем вше присутнєйшого сензационализму у медийох, алє и людзох котри приставаю буц часц риялити-програмох, лєм прето же би ше чуло їх глас. Медзитим, у случаю у тей представи, риялити-шоу источашнє и манипулация, спреводзка власнїка препаднутей фабрики, та ше закончує траґично.

Чежку тему тей траґикомедиї искусни сивецки ґлумци винєсли прешвечлїво, аж професийно, цо було обачиц и по реакцийох публики, понеже приказує и менталитет наших людзох котри ше зоз своєй бриґи можу и нашмеяц.

З предсидательом Националного совиту Руснацох и покраїнским посланїком Славком Рацом, вчерайшу представу Сивчанох на Мемориялє патрела и покраїнска посланїца, режисерка Єлена Балашевич.

ПОВЯЗАНИ ТЕКСТИ