РУСКИ КЕРЕСТУР – Основна школа „Петро Кузмяк” вчера пред вечаром випровадзела 36 своїх школярох осмей класи. На шветочней програми подзелєни дипломи найуспишнєйшим, а у просторийох Школи мали матуранти отримали и свой матурски вечар.
Поприбераних маломатурантох у шветочней колони зоз Школи випровадзели директорка, класни старшини и наставнїки. Школяре ше прешпацирали по Дом култури, а през драгу их з аплаузом провадзели родичи, родзина и други Керестурци.
Шветочну програму пошвецену малим матурантом у преполней Велькей сали Дому култури виведли школяре седмей класи ОШ, а урядово ше од нїх одпитала и директорка Школи Хелена Пашо Павлович и пожадала им вельо успиху у дальшим школованю.
Пашо Павловичова и оддзелєнски старшини Мелания Боянович и Паулина Рац одличним школяром и школяром найуспишнєйшим на рижних змаганьох подзелєли дипломи, а за школярку ґенерациї преглашена Терезка Будински, котра подзековала Школи и своїм найблїзшим на тим вельким припознаню.
Програма закончена з „нєурядову” гимну на випровадзаньох осмакох „Петнацрочним” (авторох М. Зазуляка и Лю. Загорянския), хтору им вишпивали рок младши товарише.