РУСКИ КЕРЕСТУР – Школа „Петро Кузмяк” вчера була домашня єдней ґрупи наставнїкох сербского язика як нємацеринского з општинох на югу Сербиї, а у рамикох проєкту „Стретнуца наставнїкох сербского як нємацеринского язика” Координацийного цела Влади Републики Сербиї за општини Медведя, Буяновац и Прешево.
Госцох у Керестуре привитала директорка Школи Хелена Пашо Павлович и упознала их зоз Школу и наставу. На годзинох сербского язика при наставнїцох Мариї Балїнт и Еуфемиї Чапко провадзели комбиновану сучасну методику настави, а потим отримани Округли стол, дзе з домашнїма наставнїками вичерали искуства з роботи.
Госцом на чолє бул Рагим Салихи, совитнїк директорки Служби Координацийного цела Влади Републики Сербиї за општини Медведя, Буяновац и Прешево, а у рамикох спомнутого проєкту наставнїки з югу Сербиї вчера нащивели и школу у Бачким Петровцу. Друга ґрупа наставнїкох була у школох з мадярским наставним язиком у општинох Канїжа и Сента.
Як плановане, наставнїки з югу Сербиї нєшка буду госци и Покраїнского секретарияту за образованє, предписаня, управу и национални меншини-заєднїци, дзе им буду винєшени позитивни войводянски искуства у образованю националних меншинох.