СЕРБИЯ – Школяре штвартих класох основних школох зоз Сербиї на 27. месце по посцигнуцох з математики, указало Тимс виглєдованє хторе у 49 державох окончело Медзинародне здруженє за евалуацию образовних посцигнуцох.
На представяню у Влади Сербиї методолоґ Тимс виглєдованя Ивана Якшич гварела же зоз 518 бодами з тесту з математики и 525 бодами з тесту з природних наукох, нашо школяре над просеком, хтори виноши 500 боди.
Якшичова визначела же виглєдованє указало цо нашим школяром оможлївює добри резултати. То социо-економски статус, чий индикатор було образованє и занїманє родичох, а значне и предшколске образованє, вчасна язична и математична писменосц. Позитивне становиско спрам математики и самодовириє школяра значне за успих у тей обласци, указало виглєдованє.
На основи посцигнуцох з математики Сербия за социоекономски розвитшима державами як цо Канада, Австралия, Шведска, Словения, та Нємецка.
Директорка Институту за педаґоґийни виглєдованя Николета Ґутвайн здогадла же Сербия у тим виглєдованю участвовала штири раз. У остатнїх двох циклусох зоз Сербиї участвовали школяре штвартих класох, а 2019. року плановане випитованє школярох штвартих и осмих класох, же би ше видзело напредованє школярох котри тестовани того року.