РУСКИ КЕРЕСТУР – Прешлого викенду школяре керестурскей Основней и штреднєй школи „Петро Кузмяк” були успишни на змаганьох зоз сербского язика и з биолоґиї.
На Окружним змаганю зоз сербского язика як нємацеринского, хторе отримане у Кули 17. априла, у конкуренциї седмих класох найлєпши були керестурски школяре. Перше место завжала Мартина Афич; Мария-Славка Мудри и Тереза Будински подзелєли друге место, а треца була Инес Санкович. Змагал ше ище и Иван Чизмар.
У катеґориї осмих класох перши три места тиж завжали керестурци школярки – перше Михаела Еделински, друге Йована Ноґавица, треце Леонтина Штефанко, а змагали ше ище Антония Монар и Тимеа Будински. Шицких школярох за змаганє пририхтовала професорка Мария Балїнт.
На Окружним змаганю з биолоґиї за штредньошколцох, хторе 19. априла отимане у Зомборе, школярка трецей класи керестурскей школи Луция Васович завжала друге место и пласовала ше на Републичне змаганє, 24. мая у Новим Садзе. Попри нєй, з керестурскей Школи участвовали ище штверо школяре, а пририхтовала их професорка Евелин Блаґоєвич.
Внєдзелю, 19. априла, на Републичним змаганю з английского язика у Беоґрадзе участвовали и матурантки руского оддзелєня Ґимназиї Кристина Малацко и Марияна Колошняї, з професорку Кристину Куколь. По єй словох, у барз моцней конкуренциї, сам пласман на Републичне змаганє за керестурски школярки и Школу барз вельки успих.