КУЛА – Општина Кула и того року предлужела з добру праксу наградзованя найлєпших школярох у шицких основних и штреднїх школох з местох кулскей општини, так же школяре ґенерациї вчера достали по лаптоп.
Лаптопи достали дванацецеро найлєпши школяре – осмеро з основних школох (дзе и Школа за основне музичне образованє) и штверо зоз штреднїх школох.
Медзи наградзенима и школярки ґенерациї у Основней и штреднєй школи „Петро Кузмяк” з Руского Керестура – Терезка Будински у Основней и Соня Кнежевич у Штреднєй школи (пре приємни испит на факултету, лаптоп нє прияла особнє), як и школярка ґенерациї у ОШ „Петефи бриґада” у Кули Сара Мармила.
Награди школяром уручели предсидатель Општини Кула Перица Видеканїч и предсидатель Скупштини општини Велибор Милоїчич.