КУЛА – У штреднїх школох у местох кулскей општини за други уписни круг остало коло 130 шлєбодни места, пише портал ИПЦ Кула.
У Штреднєй технїчней школи „Михайло Пупин” у Кули 23 шлєбодни места єст за напрям Електротехнїчар автоматики, за напрям Машински технїчар 19, а за напрям Автомеханїчар три шлєбодни места.
У Економско-тарґовецкей школи у Кули єст коло 10 шлєбодни места за напрям Финансийни технїчар и штири шлєбодни места за напрям Конобар.
У Штреднєй фаховней школи у Червинки єст 23 шлєбодни места за напрям Поживови технїчар, 25 за напрям Гортиклутура и 6 за фризерски напрям.
У Штреднєй школи „Петро Кузмяк” у Руским Керестуре за тераз пополнєти шицки места за напрям Туристични технїчар, у оддзелєню Ґимназиї з руским наставним язиком єст ище 26 шлєбодни места, док вироятно будзе даєдно место и у оддзелєню Ґимназиї зоз сербским наставним язиком.
Точне число уписаних у першим уписним кругу до керестурскей Штреднєй школи будзе познате на ютре, 8. юлия, дознава Рутенпрес.