Шнїє на трону слухац гимну

автор маз
1.4k Опатрене

Накадзи направел свойо перши крочаї, Матей Кршич з Руского Керестура почал бегац и за лабду. Тераз тот дзевец-рочни талантовани спортиста тренира у Школи фодбалу ОФК „Оджак”, дзе за нєполни два роки посцигнул значни успихи. Найвекши адут му моцне бице з лїву ногу, алє и швидкосц, хтору нашлїдзел од оца Мирослава, бувшого фодбалера.

– Матей почал бавиц фодбал цалком случайно. Бул раз зо мну кед сом бавел за ветеранох у Лалитю, дзе єден мой пайташ, хторому син бавел у ФК „Текстилац” у Оджаку, видзел же Матей фино бави и поволал го най придзе и вон тренирац. Так шицко почало, концом авґуста пред двома роками – здогадує ше Матейов оцец Мирослав.

Кед пошол до Оджаку, Матей нє мал анї єден тренинґ, а уж такой бавел на змаганю. После го волали же би пошол тренирац до Школи фодбалу ОФК „Оджак”, дзе и тераз тренира з когуциками – зоз свою, алє и рок старшу ґенерацию. Хваля го же є одлучни и упарти, а гоч на тренинґох и дакус лєнїви, на змаганьох дава шицко од себе.

– Ми ше змагаме углавним на турнирох. Я бавим на предку на лївим боку, бо копам з лїву ногу. Вона ми моцнєйша, алє можем дац ґол и з праву, лєм нє так моцно. Ходзиме бавиц до вецей местох и уж мам пайташох по цалей Войводини – цеши ше Матей, хтори ма уж и коло 20 медалї, як и два погари хтори достал за ґолґетера и исто тельо за найлєпшого бавяча.

НАЙВОЛЇ ДАЦ ОДЛУЧУЮЦИ ҐОЛ

– Пайташе у школи ми гваря „Браво Крле”. Барз любим фодбал. Кед дам ґол, цешим ше, а окреме кед то одлучуюци ґол. Фино ми и кед ми кляпкаю. Напарте ми дакус же попри школи и ученя два раз тижньово ходзим на тренинґи, а през викенд на змаганя, и дакеди ми тото путованє и допиє, алє фодбал нїґда, та нє одцтупим. Же би дахто бул успишни фодбалер треба же би верел же кед вистанє, же заш лєм може ище. Нє треба буц себични, бо то тимски спорт – гвари Матей.

НЇЧ ИМ НЄ ЧЕЖКО

За його успих барз заслужни його родичи, хтори жертвую свой час, алє и досц вельки пенєж же би Матей ходзел на тренинґи и турнири.

– Тренинґ му вше почина на седем годзин вечар, та кед ма пополадню школу, позберам го на пол седмей, у авту ше преблєка и идземе до Оджаку, а кед ше врациме дому, та ше ище учи. Кед ма рано школу, вец лєгчейше. Родичи вожа дзеци и на турнири, дзе плациме гориво и котизацию. Досц треба уложиц, а нас мешачно шицко тото кошта и коло 22 000 динари. Менаджере споминали же би го сцели до селекциї репрезентациї Войводини, алє вон ище нє ма досц роки – гвари оцец Мирослав.

И мац Марина велька потримовка Матейови, хтора гвари же вон за лабду почал бегац ище у яшелькох.

– Кед мал рок, учителька у яшелькох ми гварела же ше шицки дзеци даяк бавя, лєм Матей бега з лабду и же з нього цошка будзе – та най би и було. Алє, и кед нє посцигнє дацо, цошка дожил и научел. Нїґда нам нє будзе жаль,  бо би нам баржей було нєправо кед би анї нє пробовал – визначує мац Марина.

Як гвари Матей, найвекше дожице му було кед бавели процив „Партизану” и ище их и победзели, як и процив „Чукаричкого”.

– Теди сом мал трему пред змаганями, алє их занавше будзем паметац. Навиям за „Барселону”, „Реал Мадрид” и за нашу репрезентацию, у хторей бим любел бавиц док вирошнєм, як и у „Чукаричким”. Облюбени фодбалер ми Кристияно Роналдо, а сон ми же бизме 23. авґуста на интернационалним змаганю у Старей Пазови станули на трон и же би нам грали гимну – гварел на концу Матей з його препознатлївим ошмихом и зоз намесцену фризуру яку ноши и його идол.

Foto 9

ПОВЯЗАНИ ТЕКСТИ