БЕОҐРАД – Менєй як трецина младих од 15 до 29 рокох нєзанята, а першу роботу чекаю од 11,7 до 41 мешац, поведзене на представяню звиту Медзинародней орґанизациї роботи „Транзиция младих женох и хлопох на тарґовищу роботи Републики Сербиї“.
На основи податкох з марца 2015. року, штварцина младих у Сербиї нє роби, анї ше нє школує. Уровень нєзанятосци младих 30,8 одсто, а окреме високи процент нєзанятих високообразованих младих.
Спомедзи занятих младих 17,3 одсто нє ма подписани контракт, а 39,1 одсто тих котри го маю прияти на одредзени час, векшина на рок, лєбо менєй.
Стаємна координаторка Зєдинєних нацийох (ЗН) у Сербиї Ирена Воячкова Солорано гварела же ЗН и Влада Сербиї маю пейцрочни план за помоц младим у доставаню роботи и додала же „желєни роботи“ годни буц будучносц за младих у Сербиї.