ПЕТРОВАРАДИН – Наш визначни, писатель, новинар, публициста, учитель, роботнїк у култури и театре, єден з доаєнох литератури Руснацох на тих просторох и заслужних роботнїкох у нашим културним и дружтвеним живоце Штефан Гудак поховани вчера пополадню на теметове у Петроварадинє.
Попри фамелиї, родзини и приятельох, Штефана Гудака на його остатню драгу випровадзели числени почитователє з наших местох, представителє наших установох и орґанизацийох, а орґанизовано, на окремним автобусу, од Штефана Гудака ше пришли одпитац и Руснаци з местох у Горватскей.
Обряд хованя окончели парох новосадски о. Юлиян Рац и дзияк Йовґен Надь, а над труну ше од покойного з доберанима словами одпитали Микола Шанта, у мено наших установох и орґанизацийох, Звонко Костелник, у мено Руснацох з Горватскей и Владимир Кочиш, у мено Дружтва писательох Войводини, котри визначели Гудакову нєсебичну творчу роботу и доприношенє образовному, културному и литературному животу Руснацох з обидвох бокох Дунаю, як и спознаню о Руснацох поза гранїци.
Штефан Гудак народзени у Миклошевцох 6. януара 1931. року, а после длугшей и чежшей хороти умар 22. фебруара у Петроварадинє.