НОВИ САД – Покраїнски секретарият за привреду, обезпечованє роботи и ровноправносц полох розписал штири конкурси за додзельованє безповратних средствох за унапредзенє положеня Ромох у Войводини, за цо видвої вєдно 7 милиони динари.
За унапредзенє положеня Ромох у обласци биваня предвидзени 3 милиони динари, за софинансованє програмох образованя Ромох у висших класох ОШ обезпечени 2 милиони динари, а за софинансованє виробку локалних акцийних планох за унапредзенє положеня тей националней меншини опредзелєни милион динари. Иста сума предвидзена и за штварти конкурс, на хтори можу апликовац ромски нєпрофитни здруженя гражданох, тиж з проєктами за унапредзенє положеня Ромох.
Помоцнїца покраїнского ресорного секретара задлужена за унапредзенє положеня Ромох Славица Денич поволала представительох нєвладового сектору и локални самоуправи з Войводини же би ше приявели на конкурси и вєдно предлужели запровадзованє активней политики за злєшпованє положеня тей популациї.