БЕОҐРАД – Синдикати просвити предлужую штрайк и на пондзелок, 22. децембра, цалком застановя роботу у школох и отримаю протести у векших городох, наявене на вчерайшей заєднїцкей конференциї за новинарох.
Пре нєзадовольство з розгварками з Владу, синдикати наявюю можлївосц нєзаключованя оценох и нєизвесни початок другого полроча.
– Кед Влада нє сце уложиц до образованя, страци образованє – гварел предсидатель Синдикату роботнїкох у просвити Сербиї Слободан Брайкович.
Синдикати у законским штрайку шейсц тижнї и вимагаю же би им ше нє зменшовало плаци, а водзаци особи тих синдикалних орґанизацийох на заєднїцкей конференциї вимагаю од Влади же би пошвидшала прегварки о їх вимогох кед, як гварели, сце добре просвити Сербиї.
Рочно потребни коло 22 милиони еври же би плаци просвитних роботнїкох остали на истим уровню, без зменшаня за 10 одсто, поведзене на конференциї и наведзене же тот пенєж лєгко мож найсц з прерозподзельованьом у „просвитним буджету”.