НОВИ САД – Филозофски факултет у Новим Садзе нєшка означи Европски дзень язикох, хтори ше од 2001. року означує 26. септембра у 47 державох-членїцох Совиту Европи, пре указованє на значносц ученя язикох и промоцию медзикултурного диялоґу, та язичного и културолоґийного богатства Европи.
У голу Факултету на 9 годзин буду поставени постер-презентациї язикох хтори ше виучує на Факултету, а на поладнє будзе отворена вистава кнїжкох „Бешедуй зомну!” („Разговарај са мном!”), хтора облапя странски язики и язики националних меншинох хтори ше на Факултету виучує прейґ студийних ґрупох, медзи нїма и руски язик. Буду заступени и странски язики хтори ше на Факултету учи у Центре за язики.
На 14,30 г. у Кино-сали будзе приказани кратки филм „Дзивки у високих запеткох” („Девојке у високим потпетицама”), у режиї Танї Станоєв и Вукашина Живалєвича, док на 19 г., на истим месце будзе отримани концерт хорох, а на нїм участвує и новосадски Мишани хор „Гармония”.
Найменєй половка шветового жительства бешедує два, лєбо вецей язики. Двоязичносц оможлївує лєгчейше ученє додатних язикох, злєпшує роздумованє и змоцнює контакти з другима людзми и їх културами, а знанє вецей язикох помага и при глєданю роботи.