РУСКИ КЕРЕСТУР – На ютре и поютре, 13. и 14. авґуста, у Руским Керестуре будзе Туристично-привредно-културна манифестация „Днї керестурскей паприґи”, а главни орґанизаторе – Здруженє паприґарох „Капсикум анум” и Конїцки клуб „Русин”, и того року наявели богату и рижнородну програму.
Манифестация на ютре, на соботу, почнє на 11 годзин на оглядним полю под паприґу у хотаре на Ярашу, дзе нащивительом буду представени вецей файти паприґи и способи єй хованя, а потим буду отримани фахово консултациї. После оглядного, ютре плановане обиходзенє ище двох-трох польох под паприґу.
„Днї керестурскей паприґи” на ютре урядово буду отворени на 17 годзин у центре валалу, дзе на коло 25 штандох буду представени рижни нашенково, хемийни и осиґуруюци хижи, продукователє желєняви и домашнїх продуктох и виробкох.
У центре будзе и културно-уметнїцка програма, дзецински маскенбал, додзельованє наградох и варенє традицийних єдлох, а наявене варенє осем файтох єдлох у 15 котлох.
Орґанизаторе на отвераню обчекую и представительох Општини Кула и Покраїнского секретарияту за польопривреду, водопривреду и лєсарство, хтори финансийно потримую манифестацию.
Други дзень, на нєдзелю, 14. авґуста, „Днї керестурскей паприґи” буду на Гиподроме „Леї”, дзе на 14 годзин почню дринґацки коньски обегованя, алє и рижни провадзаци змисти.
Предвидзени штири єднозапрагни дринґацки коньски обегованя, дефиле фиякерох и ревиялне двозапрагне дринґацке коньске обегованє.
