МИХАЛОВО (ПОЛЬСКА) – На пияток и соботу, 5. и 6. авґуста, у Михалове, у Польскей, будзе 36. фестивал „Лемковска ватра на цудзини”, хтори орґанизує Здруженє Лемкох Польскей. Фестивал почнє з традицийним палєньом огня при памятней табли на Акцию „Висла”, а „Ватру” отвори наступ дзецинского ансамблу „Ластовичка”. На ютре вечар будзе додзелєна и „Никифорова награда”, хтору ше додзелює поєдинцом за ширенє, розвой и пестованє лемковскей култури.
У пиятковей програми на „Лемковскей ватри на цудзини” участвую Ансамбл „Терочка” з Ґорлицох, як єдини ансамбл з лемковского боку Карпатох, з краю одкаль Лемки виселєни, а потим публику до рана буду забавяц вецей домашнї и иножемни „модерни” ансамбли – дует „РЕ-Карпати”, „Ромбазаграт” з Ческей, „Грдза” з Прешова, зоз Словацкей, та польски „Демай”. Шицки граю и шпиваю и модерни обробки лемковскей-русинскей етно-музики.
На соботу пополадньова часц „Ватри” пошвецена дзецом и їх творчосци, а попри домашнїх ансамблох „Кичерка” и „Ластовчата”, участвує и дзецински ансамбл „Барвинок” з Камюнки, зоз Словацкей, чийо старши члени наступя на вечаршей програми. Попри нїх, свою нову програму на „Ватри” укаже познати Ансамбл „Кичера” з Леґници, а потим знова наступя музични ґрупи – „Лемко блуґрас бенд” з Львова, з України, домашнї „Карамбабуля”, а публику до рана будзе забавяц ґрупа „Водограй”.
Попри спомнутих програмох, под час „Лемковскей ватри на цудзини” у „Хижи при церкви” будзе вистава малюнкох, а коло уходу на польо дзе гори „лемковска ватра” вистава пошвецена преселєню Лемкох до України. Фестивал ма и спортску часц, та буду змаганя у фодбалє и рукомету, у дзепоєдних стародавних бавискох, а дзеци ше буду змагац и у шпиваню и рецитованю. Цали фестивал провадзи и богата програма за розвагу.