Ютре о „Шлєбоди виражованя у войводянских националних заєднїцох”

автор маз
860 Опатрене

НОВИ САД – У Медия центру Войводини Нєзависного дружтва новинарох Войводини (НДНВ) на ютре на 11 годзин будзе отримани округли стол з тему „Шлєбода виражованя у войводянских националних заєднїцох”.

Панелисти округлого столу буду шефица Оддзелєня за медиї Мисиї ОЕБС-у у Сербиї Ґордана Янкович, заменїца Покраїнского омбудсмана за защиту права националних меншинох Ева Вукашинович, главни и одвичательни редактор Другей програми Телевизиї Нови Сад-РТВ Атила Мартон, експерт за меншински питаня Мирослав Кевежди и универзитетски професор Алпар Лошонц.

Модератор розгварки предсидатель Вивершного одбору НДНВ Недим Сейдинович, а уводнїчар будзе член Вивершного одбору НДНВ и редактор сайту „Автономия” на мадярским язику Чаба Пресбурґер.

На округлим столє будзе бешеди о специфичних препреченьох шлєбоди виражованя у националних заєднїцох, як зопрец политични уплїв политичних странкох и националних совитох на ушорйовацку политику меншинских медийох, як и о тим чи обнавянє предплати за РТВ, приватизация локалних медийох и проєктне финансованє медийских змистох будзе мац позитивни, чи неґативни одгук на шлєбоду виражованя у националних заєднїцох.

Проєкт финансує Министерство култури и информованя.

ПОВЯЗАНИ ТЕКСТИ