Ютре позарядова Скупштина акционерох „АБЦ ФУД”

автор зам
934 Опатрене

РУСКИ КЕРЕСТУР – На ютре, 26. децембра, на вимогу векшинскей власнїци, Привредни суд у Зомборе зволал позарядову Скупштину акционерох керестурскей„АБЦ ФУД”.

Скупштина будзе отримана у Оджаку (Зомборска 23, як дознава Рутенпрес, у просторийох новтаруша), на 12 годзин, а попри приношеня одлукох о новим Статуту и сановательниум акту Дружтва, маю буц розришени члени Управного одбору, меновани нови Одбор, директоре и заступнїки Привредного дружтва „АБЦ ФУД”.

На жалбу Михайла Катону спред малих акционерох „АБЦ ФУД” же Привредни суд у Зомборе нє реаґує на послати пригварки поверительох о нєвиплацованю длуства у терминох одредзених з Планом реорґанизациї „АБЦ ФУД”, у писменим „Вияшнєню” зоз Суду потолковане же, на основи Закона о предликвидацийним поступку, з прилапйованьом Плану реорґанизациї престала компетенция предликвидацийного судию и Суд нє ма право контроловац запровадзованє Плану реорґанизациї.

Як ше гвари у спомнутим вияшнєню – же би ше порушало реаґованє Суду, потребне же би поверителє, попри жалби же предликвидацийни длужнїк нє запровадзує План реорґанизациї, до Суду придали и „порядни” Предлог за порушованє предликвидацийного поступку пре нєпоступанє по Плану реорґанизациї.

„Порядносц” предлогу значи же би бул у смислу члена 56. Закона о предликвидацийним поступку, а у тим случаю анї єден таки предлог нє дати и лєм по обвисценьох о нєпочитованю Плану реоеґанизациї, Суд нє може поступац.

Катона достал одвит и од судию хтори зволал терашню позарядову Скупштину акционерох, у хторим ше гвари же є зволана по законских предписаньох.

ПОВЯЗАНИ ТЕКСТИ