Ютре у Керестуре Општинска смотра музично-фолклорней творчосци за старших

автор зам
1.1k Опатрене

РУСКИ КЕРЕСТУР – У Велькей сали Дому култури Руски Керестур на ютре, 22. мая, будзе отримана 56. Општинска смотра музично-фолклорней творчосци за старших. Програма почина на 17 годзин, а уход отворени и шлєбодни за шицких заинтересованих патрачох.

На Смотри ше буду змагац шпивацки, музични и танєчни ансамбли з домох култури и КУД-ох з местох кулскей општини, а Дом култури Руски Керестур участвує з вецей точками, як и Руске КУД „Др Гавриїл Костельник” з Кули.

У блок-програми Дому култури Виводзацки фолклорни ансамбл виведзе танци „Вечар на валалє” и „Ильков танєц”, а Хлопска шпивацка ґрупа Венчик руских виходнярских шпиванкох. У тей часци наступи и Мишана шпивацка ґрупа з двома народнима шпиванками.

На Општинскей смотри ше зоз своїма точками окреме буду змагац и Дзивоцка шпивацка ґрупа, Женска шпивацка ґрупа, Хлопска шпивацка ґрупа и Тамбурови оркестер Дому култури. Танци и музични точки з керестурскима аматерами пририхтали Ґабриєла Саянкович и Юлиян Рамач Чамо.

Руске КУД „Др Гавриїл Костельник” з Кули на Општинскей смотри участвує зоз Женску шпивацку ґрупу и Хлопску шпивацку ґрупу, хтори виведу по два руски народни шпиванки. Їх фахови руководитель Еуфемия Планкош.

Селектор Смотри хореоґраф Любомир Вуйчин з Вербасу, а орґанизаторе и домашнї змаганя Културно-ппросвитна заєднїца Општини Кула и Дом култури Руски Керестур.

ПОВЯЗАНИ ТЕКСТИ