РУСКИ КЕРЕСТУР – У уводней часци вчерайшей програми Шветочного концерту „На штред широкей ровнїни” на 55. Фестивалє рускей култури „Червена ружа”, после гимни Републики Сербиї „Боже правде” и шветочней шиванки Руснацох у Сербиї „Браца Русини”, привитани шицки нащивителє, а окреме визначни госци -подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михаль Нїлаш, предсидатель Националного совиту (НС) Руснацох Славко Рац, народна посланїца у Скупштини Сербиї Олена Папуґа, заменїк предсидателя Општини Кула Кароль Валка, як и делеґациї Руснацох з Горватскей и Словацкей.
Привитуюци Фестивал, подпредсидатель Покраїнскей влади Михаль Нїлаш у своєй пригодней бешеди похвалєл витирвалосц Руснацох у отримованю своєй длугей традициї, на хтору ше, як гварел, можу спатрац и други народи.
– Прешвечел сом ше до велькей нащивеносци и богатей програми вашого Фестивалу, та спред Покраїни можем повесц же предлужиме потримовац тот найстарши фестивал култури Руснацох на тих просторох – гварел Нїлаш, котри и зоз стихами нашого Гавриїла Костельника указал на значносц пестованя свойого язика, як єдного з фундаментох каждого народу.
Предсидатель НС Славко Рац ше огляднул на обставини у хторих ше отримує тогорочну „Червену ружу” – без єдней з водзацих особох у орґанизациї и отримованю Фестивалу Юлияна Рамача Чаму, котри ше нєсподзивано упокоєл праве на дзень першобутного термину „Ружи”.
Спред Општини Кула, хтора тиж у значней мири финансийно потримує културни збуваня Руснацох у локалним штредку, заменїк предсидателя Општини Кароль Валка виражел задовольство же ше таки значни фестивал отримує у кулскей општини.