Новини су таки, яки є и їх ґазда. Кед є ґазда треце замахайло, або даяка битанґа, то ше дораз обачи на новинох. Папер є церпезлїви. Шицко поднєше чарна тинта нє почервенєє, гоч ше яку ганьбу напише на били папер. Вони су слика души ґаздовей, цо до нїх пише; хтори може найкраши ствари прияц на себе, а и найбридши. Яки ґазда, таки новини.
Прето єст вшелияки новини, як и вшелияки людзе. Єст добри, єст зли. Єст безчесни, єст опасни, єст кривих напрямох, єст проци християнски.
Єст без фарби, котри пре пенєж робя и нємаю идеали и добри цилї. Тоти ше подкупиц даю и пишу як им ше плаци. Алє єст ище на швеце и чесних людзох, па прето єст и таки новини. Єст новини цо браня правду шмело, отверено; цо караю спревоцку, насилност, погубеносц; цо браня церкву и христов такон, єст християнски новини, хтори стоя на темелю природно божою закона и обявленого. То су нпр нашо новинки. Таки новинки ше маю бориц процив безбожникох и тайних нєприятельских силох; о чим будземе бешедовац у слїдующим числу.
Напис обявени у „Руских новинох” число 3, на 1. боку