Школяре Основней школи „Братство-єдинство” у Коцуре маю нагоду после годзинох пойсц на тренинґи каратеa хтори у їх школи трима Карате клуб „Вербас” зоз Вербасу. Зоз нєдавно отриманого змаганя у Суботици врацели ше зоз припознанями.
Тренер Йован Сабо зоз Вербасу барз задовольни з ґрупу школярох зоз хторима уж другу сезону роби у Коцуре. Як толкує, на тренинґи приходзa дацо вецей як двацец школярe возросту од 6 по 14 роки.
– Карате клуб „Вербас” вишол вочи родичом, та же би дзеци нє мушели путовац до Вербасу и плациц превоз, ми орґанизовали годзини каратеa по валалох у општини Вербас. Школяре зоз хторима я робим у Коцуре маю жовти пaс, а годзини тримаме два раз тижньово. Нарок почнєме робиц з нову ґрупу, та будземе мушиц увесц ище єден термин – толкує тренер.
Карате клуб „Вербас” иснує уж 40 роки, ма вецей як 400 членох, и прето є найвекши клуб у Сербиї хтори пестує тоту борецку схопносц. Тренер Йован Сабо обяшнєл же тота япoнска дисциплина хтору школяре тренираю як спорт добра и за физичну, алє и психичну надбудову.
– Нє лєм же ше вежба борецку схопносц, алє карате барз добри и за здравє, бо ше перманентно розвиваю и психа и физична активносц. Моторични схопносци дзецка барз приходза до вираженя, цале цело анґажоване, а то потребне дзецку за розвой и дальши живот. Попри тим, дзецко здобува вельке самодовириє и роботни звикнуца – гвари Сабо.
Клуб школярох водзи лєм на векши змаганя, праве прето же би зменшали трошки путованя. После успишного змаганя у Суботици, школяре ше рихтаю за першенство хторе будзе отримане 8. мая у Вербаше, а вец за покладанє помаранчецового пaсу у юнию, после чого маю лєтнї розпуст. Тренинґи каратеa вовторками од 20 годзин и штвартками од 19 годзин, а тренер поволує заинтересовани дзеци же би ше приключели ґу своїм парняком на годзинох.