РУСКИ КЕРЕСТУР – Ґимназиялци другей класи Штредней школи „Петро Кузмяк” – по шесцеро школяре з руского и сербского оддзелєня, з професорку Наталию Будински вчера отримали скайп-годзину з парняками з єдней школи у Велсу (Велька Британия) и їх наставнїком Полом Воткинсом.
На годзини школяре єдни других упознали з темами зоз школярского живота, о препровадзованю шлєбодного часу и подобним, поставяли питаня о интересантносцох у їх месце, о орґанизованю школского живота, о музики, спорту и другим. Як дарунок своїм парняком, школярка Марина Роман з Крестура, з провадзеньом товаришкох, одшпивала два сучасни анґлийски шпиванки.
Школяре ше єдни другим питали и хтори язики виучую, а Велшанох интересовало хтори язик нашим школяром главни. Понеже комуникация була по анґлийски, на концу професор Воткинс похвалєл знанє анґлийского язика наших школярох.
Як за Рутенпрес гварела професорка Наталия Будински, скайп-годзина у керестурскей Школи орґанизована другираз, а дзекуюци членству Будинсковей у заєднїци Микрософиновативних наставнїкох, дзе професор Воткинс скайп-мастер. То заєднїца наставнїкох котри у настави применюю сучасни способи роботи, з акцентом на хаснованю микрософт-технолоґийох.
Циль таких скайп-годзинох повязованє и медзисобне упознаванє школярох, а тиж и хаснованє сучасних способох интернет-комуникациї, а як гварела Будинскова, то лєм початок таких годзинох у керестурскей Школи.