ЗОМБОР – Министер польопривреди Ґрузиї Леван Давиташвили нащивел Польопривредну фахову службу у Зомборе, а найбаржей ше интересовал за систему сертификованя нашеня.
Ґрузия нєдавно подписала спорозуменє о стабилизациї и придружованю Европскей униї, а Сербия ма векше и длугше искуство у тей обласци.
– Нас интересує робота польопривредних службох, жадаме видзиц як вони орґанизовани у Сербиї. Як функционує система и процес сертификованя, з оглядом же ми запровадзуєме систему сертификованя, а тиж зме заинтересовани и за продукцию бобкастей овоци – гварел Давиташвили.
У найлєпшей совитодавней служби Сербиї, госц з Ґрузиї могол видзиц посцигнути резултати на терену. По словох директора Владимира Сабадоша, од 1956. року Польопривредна фахова служба Зомбор нєпреривно унапредзовала свою роботу, а ма и наймодернєйши едукативни центер за польопривреднїкох.
– Представели зме оглядни поля, посцигнути резултати, як робиме тести, та и нашо сертификовани лабораториї – гварел Сабадош.
– Ґрузия традицийна винїцарска жем, а Сербия озбильно напредовала у тей обласци през остатнї дзешец роки, та зме черали искуства. Окреме були заинтересовани и за интензивну продукцию яблукох, вишньох, черешньох и лїсковцох – виявел державни секретар Министерства польопривреди Велимир Станоєвич.
Ґрузийски министер польопривреди бешедовал и з городскима чолнїками о других способох сотруднїцтва, а мал и схадзку з представнїками Реґионалней привредней комори и представнїками подприємствох з обласци польопривреди.