ЗЕМПЛИНСКИ ТЕПЛИЦИ (СЛОВАЦКА) – На поволанку старостки Општини Земплински Теплици Йозефини Угаловей, прешлого викенду предсидатель Националного совиту (НС) Руснацох Славко Рац и предсидателька Одбору за културу НС Ґабриєла Саянкович, та наш кантавтор Сашо Палєнкаш, були госци Земплинских Теплицох (дакедишнї Керестур) и фестивалу „У Керестуре на пажици граю”, хтори там отримани 19. и 20. септембра.
З Йозефину Угалову бешедоване о можлївосцох сотруднїцтва Руснацох зоз Сербиї и краянох зоз Земплину у вецей обласцох, з тим вецей же нам барз подобни бешеди, та єдни з можлївосцох у тим напряме би були и медзисобни нащиви школярох основних школох, понеже, як гварели домашнї, їх дзеци вше менєй бешедую на „стародавней гуторяцкей бешеди”.
Делеґация НС нащивела и професийни Фолклорни ансамбл „Желєзар” у Кошицох, дзе о можлївосцох за сотруднїцтво бешедоване з директором Ансамблу Владимиром Урбаном, тамтейшим познатим хореоґрафом, виглєдовачом и зазберовачом народней традицию Земплину. Попри о госцованьох, бешедоване и о сотруднїцтве у обласци фолклору, понеже и Саянковичова и Палєнкаш источашнє и хореоґрафе у керестурским Доме култури.
Фестивал у Земплинских Теплицох, односно Фолклорни шветочносци, того року отримани дзешати раз, а внєдзелю, 20. септембра, наявени як „специялни госц”, Сашо Палєнкш на фестивалє виведол вецей свойо композициї.
Тогорочни Фолклорни шветочносци були пошвецени означованю 30-рочнїци снованя домашнього фолклорного ансамблу „Тепличан”. Фестивал орґанизую и финансую Општина Земплински Теплици, Музей и Културни центер южного Земплину з Требишова и Управа за културу Кошицкого самоуправного краю. На програми присуствовали и дзепоєдни посланїки у парламенту Словацкей, як и представителє Кошицкого самоуправного краю.
И попри тим же у дакедишнїм Керестуре у Словацкей до тераз уж вецей раз госцовали нашо ансамбли, та и тедишнї Руски народни театер „Дядя”, мож повесц же то була перша инициятива за запровадзованє урядового сотруднїцтва.