fbpx

Уметнїца за лакотки

автор Мa. ЗАЗУЛЯК 24. октобер 2015

Кед Дияна Колошняї з Норт Бетлфорду (North Battleford) з Канади, пред трома роками була на положнїцким, надумала свою любов ґу вареню и правеню лакоткох претвориц до малого бизнису. Од теди прави дробни колачи, питки, а найвецей торти рижних смакох, формох и велькосцох. 

За Дияново торти мож повесц же су уметнїцки дїла, украшени зоз креативнима фиґурками и цифрами хтори вона вирабя з руку, а декорацию дробних колачох найчастейше прилагодзує нагоди за хтору их прави.

„ДОБОШКА” И „ШУШКАЦА” НА ПЕРШИМ МЕСЦЕ

Дияна роби у старецким доме як кухарка, та єй робота тортарки лєм дополнююца робота, алє заш лєм єй, як гвари, одбера досц часу, бо гвари же за украшованє єдней торти потребне коло три годзини. Єй лакотки найчастейше наручую нашо людзе хтори жию у Норт Бетлфорду, алє понеже у тим месце нєт вельо цукрарнї, вше частейше до Колошняйових по колачи и торти приходза и Канадянє.

– Найчастейше людзе наручую торти за родзени днї, алє и за други окремни нагоди – свадзби, кресцини, як и за векши швета. Теди мам и найвецей роботи – гвари наша собешеднїца.

– Правим дробни колачи, питки и торти, а слане, затераз, лєм за моїх дома. Найволїм правиц округли торти и дробни колачики, бо их мож барз крашнє украшовац. Людзе любя рижни файти тортох, но, з искуства можем повесц же найволя „добошку” и „шушкацу”.

Млада тортарка свойо роботи промовує на Фейсбуку, дзе обявює слики тортох и колачох хтори напече и украши, та муштериї лєгчейше можу вибрац цо сцу. Интернет хаснує и за нови идеї у єй сладкей кухнї.

– Думам же то добри способ промоциї, бо нєшка людзе препровадзую досц часу на Фейсбуку. Часто на статус напишем же будзем правиц дробни колачи, та ше ми вец муштериї явяю же сцу наручиц. Велї идеї находзим на интернету, гоч сом нїґда нє упекла цалком исту торту яку сом там нашла. Часто здумуєм и „зоз глави”, алє опатрам и цо нове у часописох у хторих тиж находзим идеї, окреме за цифри и фиґурки хтори сама вирабям зоз фондану. У тей моєй „сладкей” роботи найбаржей уживам теди кед закончуєм, украшуєм тото цо напечем. То досц „пипкаца” робота и  ту найважнєйше  буц сцерпезлїви – гвари Дияна хтора сама научела тото ремесло, бо мала барз вельку дзеку. Виволала нам же єдна просекова торта кошта коло 60 долари, односно коло 5 000 динари, та надалєй, завиши од того хто цо сце и як сце же би упекла и  украшела. Гвари же ше у Канади виплаци буц тортарка, та єй на розуме ище цошка.

20131102_143547

 ПЛАНИ МЛАДЕЙ КУХАРКИ

– Роздумовала сом отвориц цукрарню, и наисце бим любела тоту роботу прешириц. Ту дзе ми жиєме нєт таки файти предавальнї, та думам же би ше людзом пачело – толкує вона.

Тота млада кухарка и тортарка ше з Руского Керестура до Норт Бетлфорду преселєла пред седем роками, зоз супругом Михайлом и двома дзивчатами – Мартину и Емину. Нєшка млада Колошняйова фамелия ма ище два дзивчата – тророчни двойнята, Мелису и Лейлу.

– Дзивчата би вше сцели помагац, алє кед правим за муштериї, вец ше лєм припатраю, а помагаю ми кед правиме за нас, дома. Вец наисце видно як и вони уживаю у тей роботи. Живот у такей велькей фамелиї наисце красни и интересантни. Нїґда нє допито, вше ше цошка случує, а обисце вше полне з дзецми. Вшелїяк же єст и чежки хвильки, бо у велькей фамелиї єст и вельо роботи и обовязки, алє кажде з нас ма даяке свойо задлуженє, та вец шицко идзе лєгчейше – бешедує Дияна и визначує же планує випробовац упечиц ище велї торти, а шлїдуюце єй векше „уметнїцке дїло” будзе торта – замок зоз популарного рисованого филма „Залядзене кральовство” („Frozen”), з хтору жада  нєсподзивац наймладши дзивчата за їх штварти родзени дзень.

ДИЯНА ПРЕПОРУЧУЄ РЕЦЕПТИ ЗА КОЛАЧИ

Бананово мафини

440 ґр муки

ложичка сода бикарбони

1/4 ложички солї

125 ґр марґарину (розпущовац го 20 секунди у микрогабовей релни)

300 ґр цукру

2 вайца

3 ложки шметанки

3 поджамени банани

Шицко добре зєдинїц и класц до паперикох за мафини, а потим 20-25 минути печиц на 200 ступнї.

Мож додац и 100 ґр кокосу и натартей чоколади.

Питка зоз орехами и сухим грозном

Цесто:

125 ґр розпущеного марґарину

100 ґр кафового цукру

300 ґр муки

Загнєсц и положиц до тепши (22×22);15 минути печиц на 175 ступнї

Фил:

2 вайца

250 ґр кафового цукру

ложичка муки

1/2 ложички пращку за печенє

1/4 ложички солї

ложичка ванелиї

300 ґр сухого грозна

150 ґр пошекани орехи

Шицко вєдно вимишац и усипац на упечене цесто. Потим врациц до релни и вєдно печиц 20 минути.

„Фереро Роше” кульки

200 ґр поламани наполитанки

200 ґр на векше пошекани лїсковци

300 ґр Нутели, лєбо даєдней другей файти чарного еврокрему

Шицко добре зєдинїц и охабиц у фрижидеру два годзини. Потим правиц кульки и мачац их до ґлазури: розпущиц 300 ґр млєчней чоколади и 90 ґр масла.

 

(Опатрене 645 раз, нєшка 1)