fbpx

Усоглашиц скалу бодованя

автор маф/опс 6. юний 2016

Осми класи чека упис до штреднєй школи хтори зна буц стресни и нєприємни, нє лєм школяром алє и родичом. Же би резултати були цо лєпши, родичи важни як потримовка у тим периодзе, бо дзеци на єдней крижней драги дзе ше треба порихтац и указац знанє и вибрац будуце занїманє, а тиж так и школу.

Прето ше у школох орґанизує пририхтуюци годзини зоз тих предметох хтори ше поклада на примацим испиту. Закончуюци испит ше состої зоз теста зоз математики, зоз мацеринского язика и зоз комбинованого теста зоз пейцох предметох, а то: физика, ґеоґрафия, история, биолоґия и хемия.

Наставнїки зоз тих предметох и у керестурскей Школи уключени до пририхтованя школярох, хторе тирва уж вецей мешаци, направени розпорядок хтори облапел шицких школярох и шицки предмети, же би ше нє збили даєдни предмети у єдним дню, и же би школяре прилапели тоти пририхтуюци годзини як обовязни.

РУКОВОДЗАЦИ О ЗАКОНЧУЮЦИМ ИСПИТУ

14-15 Skola-RK-direktorka portret 004 - Copy– Даєдни школяре думаю же ше можу пририхтац и сами, алє заш лєм би требало приходзиц и на тоти годзини, бо наставнїки провадза план и програму, стандарди хтори уведзени зоз предметох, та гоч годзини и нє обовязни. Тиж маме и додатни годзини дзе школяре здобуваю знанє попри порядней настави, а єст и дополнююци хтори помагаю школяром котрим треба виправиц слабши оцени – гвари директорка Школи, Хелена Пашо Павлович.

Того року ище вше ше нє одредзел праг хтори потребни же би закончуюци испит бул положени. Кед би ше тото уведло, знало би ше же ше муши мац поведзме по 10 боди зоз каждого предмета, та би то була школяром мотивация. Нове того року же испитни праг 50 боди за упис до штиророчней школи.

– Як зме видзели, нашо школяре векшином ше сцу уписац до штриророчних штреднїх школох, а дзе векша конкуренция там треба и вецей боди. Видзиме же тото школяре досц провадза – гвари директорка Пашо Павлович.

Прави модел би бул учиц ше на пририхтуюцих годзинох, а зоз збирки вежбац дома, а на пририхтуюци годзини приходзиц порихтани зоз питаньом о тим цо нє ясне же би ше з наставнїком розришело и научело. Єст и онланй тести на интернету и то може буц помоц, превериц свойо знанє.

– Мала матура подрозумює дозреванє школярох же ше подзвигує їх свидомосц же я то мам покончиц сам, указац свойо знанє найлєпше як можем, зато же тот мой успих будзе одлучуюци за упис до штреднєй школи – гварела директорка Пашо Павлович.

На пририхтуюци годзини дзеци досц солидно приходза, завиши и од їх других обовязкох, гвари Мария Шанта, педаґоґиня.

14-15 Skola-Zakoncujuci ispit - RK - 28.04– Мнє ше видзи же дзеци нє шицки свидоми же цо тот закончуюци испит значи за нїх, односно же єдна часц, можебуц половка свидоми, сцу добре научиц и порихтац ше прето же су свидоми же им тото знанє цо здобули, будзе потребне, а окреме тоти цо им потребни досц боди же би ше уписали, а єдна часц можебуц менєй свидома и нє так заинтересована. Даєдни нє були мотивовани, гоч ше з нїма бешедовало, а и родительски схадзки були на тоту тему, єдна менша часц нє була свидома цо значи тот испит – гвари Шантова.

Школа вошла до проєкта Професийней ориєнтациї цо ше роби на уровню Сербиї, и уж треци рок є уключена до ньго, цо значи же школяре седмих и осмих класох маю предвидзени роботнї по хторих ше роби же би ше упознавали и информовали зоз своїма интересованями, схопносцами.

– Школярох одводзиме до рижних орґанизацийох, подприємствох. Там школяре можу видзиц процес роботи або продукциї, и напр. случело ше же велї дзеци сцели постац ветеринаре док зме нє пошли видзиц його роботу, и такой велї гварели же то нє за нїх. Або кед зме були у Доме здравя, кед видзели напр. як ше цага крев, або дава инєкцию, дахто такой видзел чи таке годзен робиц. Так ше уча же би ше и информовали и до конца осмей класи ше освидомели и сами през шицко тото могли одлучиц цо би могли уписац – гвари Шантова.

ШКОЛЯРЕ О ПРИМАЦИМ ИСПИТУ

Иван Чизмар: – Почали зме ше пририхтовац кед зме достали Збирки задаткох, початком марца и маме и у школи пририхтуюцу наставу и дома ше пририхтуєме и на годзинох. Мнє ше видзи же найчежша математика, а кед дацо нє розумим, опитам ше наставнїци, алє углавним сам патрим ришиц задатки. Ходзим и на математику и на физику хтори маме раз до тижня. А други товарише ходза по вибору. Уписац бим ше сцел до елетротехнїчну школу у Новим Садзе, а главни предмети ми ту математика и физика. Вєдно зоз трох тестох 30 боди.

Северина Гарди: – З математики и зоз физики ходзим на пририхтуюци годзини у школи ше исто рихтаме, а дома тиж робим зоз шицкого по дакус. Задатки нє буду исти як у збиркох, та дакус ше боїм, алє ше потрудзим цо лєпше порихтац. Мнє од предметох найлєгчейше идзе биолоґия и физика, а математика так, штреднє. Любела бим ше уписац до медицинскей школи. Професийна ориєнтация нам тиж дакус помогла видзиц яки єст професиї.

Тереза Будински: – Мнє на пририхтованьох идзе досц добре. Почала сом як и векшина у марцу кед нам сцигли збирки и теди и кажди наставнїк почал пририхтуюци годзини тримац, хтори нє обовязни, а думам же векшина ходза, гоч можебуц менєй тоти хторим би вецей требало. Од того року уведзени цензус же за штиророчни школи потребне найменєй мац 50 боди, прето зме ше шицки позлєкали та ше вец дакус баржей и учиме. Я найволїм математику и физику. Математика ше окреме поклада, а физика у комбинованим тесту, та кед ше рихтам и дзечнєйше вежбам тото цо волїм, но и тото цо ми нє ясне, може ми наставнїца потолковац на пририхтуюцих годзинох. На пробних тестох зме видзели як випатраю задатки, досц добре зме прешли, знаме тераз як то шицко функционує, тиж зме видзели же яки гришки зме направели, же як ше лєгко збунїц и вецка ту обрацаме вецей увагу дзе зме гришели. Я ше плануєм уписац до нашей керестурскей ґимназиї.

Андрей Надь: – Добре же маме тоти пририхтуюци годзини, и на порядней настави ше досц роби кед закончиме порядни лекциї, дакус робиме и задатки зоз збирки. И дома тиж вежбам кеди-кельо. Я надумал до Штреднєй електро до Зомбора лєбо до Нового Саду, а там конкуренция велька, та ше мушим досц потрудзиц. Пробни тести досц добре прешли, гоч сом нє барз учел, най видзим кельо знам, та з оглядом на тото, ище сом и задовольни як сом поробел. Но, тераз ше ище маме вецей потрудзиц, бо зме свидоми же нам то важне за дальши упис до штреднєй школи.

ЕКСТЕРНЕ ВРЕДНОВАНЄ ШКОЛИ

– Екстерне вреднованє нашей школи, хторе було у марцу, дзе наша школа оценєна же барз добре роби у штирох ключних обласцох, а посцигнуца школярох нам найслабше оценєти, прето же нашо школяре нє указую даяки окремни резултати праве на тих закончуюцих испитох. То значи же у основней школи маю добри успих, аж и одлични, и кед ше упишу до нашей школи ту тиж таке посцигую, а на закончуюцим испиту подруца. Тераз ми можеме повесц же ше, можебуц, нє так потрудза, бо у нашей школи єст вецей места як школярох. Вони того свидоми, та ше прето опуща. У тей наративней часци при екстерней инспекциї я то так и винєсла. Алє чом би ше нє обрацело увагу на бодованє, думам же би бул и лєпши успих и же би школяре од себе дали вецей, бо так кед видза же у даєдним задатку треба дац пейц одвити за єден бод, вони виберу таки дзе ше за єден одвит достанє єден бод. Воля вибрац тот дзе за єден одвит достаню єден бод, як кед одвитую на штири, а достаню нула боди, бо на єдно погришели – гвари директорка Школи Хелена Пашо Павлович.

(Опатрене 121 раз, нєшка 1)